លោក Erik ten Hag បានព្រមានកូនក្រុមមិនអាចមើលស្រាលគូប្រជែង Sevilla នៅវគ្គ៨ក្រុមចុងក្រោយនៃពានរង្វាន់ UEFA Europa League នោះទេ ព្រោះពួកគេមានកំណត់ត្រាក្នុងពាននេះល្អណាស់។
បន្ទាប់ពីយកឈ្នះលើក្រុម Real Betis ៥-១ នៅវគ្គ១៦ក្រុមមក នៅវគ្គ៨ក្រុមចុងក្រោយ ក្រុមបិសាចក្រហមក៏ចាប់ឆ្នោតប៉ះជាមួយក្រុមនៅអេស្ប៉ាញមួយទៀតនៅ Sevilla ។ ក្លឹប Sevilla នេះដែរ នារដូវកាលនេះកំពុងដុនដាបដែរនៅ La Liga ព្រោះលេងមិនបានល្អនោះទេ ស្ថិតនៅពាក់កណ្ដាលតារាងឯណោះ។ យ៉ាងណាមិញ នៅពានអន្ដរជាតិវិញ ជាពិសេស Europa League គឺក្លឹបនេះមានកំណត់ត្រាល្អណាស់ ធ្លាប់ឈ្នះដល់៦ដង ហើយក៏គ្មានក្លឹបណាឈ្នះបានច្រើនជាងពួកគេនោះដែរ។
ក្រោយពីដឹងលទ្ធផលចាប់ឆ្នោតមក លោក Ten Hag បានបង្ហាញចំណាប់អារម្មណ៍បែបនេះថា៖ “Sevilla ជាក្រុមខ្លាំង និងមានកំណត់ត្រាល្អនៅពាននេះ។ វានឹងក្លាយជាការប្រកួតលំបាកសម្រាប់យើង ព្រោះពួកគេមានបទពិសោធច្រើននៅ Europa League ពួកគេធ្លាប់ឈ្នះជាច្រើនដងមកហើយ។ ខ្ញុំមិនទាន់បានកត់សម្គាល់ពួកគេលម្អិតនោះទេ ដូច្នេះខ្ញុំនឹងសិក្សានៅពេលបន្ទាប់”៕