លោក Erik ten Hag បាននិយាយសរសើរទៅលើកីឡាករ Bruno ដែលបានដឹកនាំក្រុមលេងតាំងពីដើមតង់ រហូតដល់ចប់ការប្រកួតតែម្ដង ក្នុងជ័យជម្នះ ៤-១ ក្នុងពាន Europa League ។
Bruno រកបាន១គ្រាប់ និងបញ្ជូនបាល់ឱ្យមិត្តរួមក្រុមផងដែរក្នុងជ័យជម្នះនៅយប់មិញនេះ។ ប្រធានក្រុមរូបនេះ បានស្ដាមុខមាត់ឡើងវិញ បន្ទាប់ពីត្រូវបានអ្នកគាំទ្រនិងអ្នកវិភាគជាច្រើនរិះគន់ ចំពោះទម្រង់លេងរបស់គេដែលចាញ់ក្រុម Liverpool ដល់ទៅ ៧-០ កាលពីប្រកួតក្នុងលីគ Premier League។ មានអ្នកវិភាគជាច្រើន កាលនោះ ដែលចង់ឱ្យលោក Ten Hag ដកគេចេញពីប្រធានក្រុម តែអ្នកចាត់ការសញ្ជាតិហុល្លង់មានទំនុកចិត្ត និងអះអាងថា Bruno ជាកីឡាករសំខាន់ និងទទួលបានតំណែងប្រធានក្រុមដដែល។
ជាក់ស្ដែងក្រោយចប់ការប្រកួតនៅយប់មិញ លោក Ten Hag បាននិយាយថា៖ “Bruno ធ្វើបានល្អនៅថ្ងៃនេះ។ គាត់ដឹកនាំក្រុមលើទីលានតាំងពីនាទីដំបូង។ គាត់បោះបាល់ឱ្យមិត្តរួមក្រុម និងរកបានខ្លួនឯងទៀត។ ដូច្នេះខ្ញុំសប្បាយចិត្តចំពោះការធ្វើបានល្អរបស់គាត់”៕