ក្រុម AC Milan បានឡើងទៅវគ្គ៨ក្រុមចុងក្រោយនៃពានរង្វាន់ UEFA Champions League ជាថ្មីម្ដងទៀតហើយ ក្រោយពីពួកគេចំណាយពេល១១ឆ្នាំមកនេះ។
ការឈ្នះក្រុម Spurs ១-០ នៅជើងទី១ និងស្មើគ្នា ០-០ នៅជើងទី២ គឺគ្រប់គ្រាន់ល្មមសម្រាប់ក្រុម AC Milan ដើម្បីបានកៅអីវគ្គ៨ក្រុមចុងក្រោយនៃពានរង្វាន់ UEFA Champions League ។ ក្លឹបជើងខ្លាំងអ៊ីតាលីមួយនេះ ខកខាន១១ឆ្នាំមកហើយក្នុងការឡើងមកដល់វគ្គនេះ ដោយទើបតែឆ្នាំនេះទេ ពួកគេអាចធ្វើវាបានមកវិញ។ AC Milan ស្ថិតក្នុងចំណោមក្រុមដទៃទៀតដូចជា Bayern Munich , Benfica និង Chelsea កក់កៅអី៨ក្រុមចុងក្រោយ UCL មុនគេ។ ខណៈដែល៤ក្រុមទៀតនឹងរកឃើញនៅសប្ដាហ៍ក្រោយ។
រំលឹកថា AC Milan ជាអតីតជើងខ្លាំងមួយដែរនៅក្នុងពានរង្វាន់ UEFA Champions League នេះ។ ក្លឹបមួយនេះ មានប្រវត្តិឈ្នះពានរង្វាន់ធំប្រចាំទ្វីបអឺរ៉ុប បាន៧ដងឯណោះ ដោយឆ្នាំចុងក្រោយដែលពួកគេឈ្នះគឺ ២០០៦-២០០៧ ដោយកាលនោះឈ្នះក្រុម Liverpool នៅវគ្គផ្ដាច់ព្រ័ត្រក្នុងលទ្ធផល ២-១៕