លោក Jamie Carragher បានផ្ដល់យោបល់ឱ្យខ្សែប្រយុទ្ធ Kylian Mbappe គួរតែចាកចេញពីក្លឹប PSG ទៅលេងនៅក្លឹប Real Madrid កាន់តែឆាប់កាន់តែល្អសម្រាប់រូបគេ ប្រសិនបើចង់ឈ្នះពានធំៗ។
ក្រុម PSG បានធ្លាក់ចេញពីពានរង្វាន់ UEFA Champions League ទៀតទៅហើយ ក្រោយពីពួកគេបានបរាជ័យក្រោមថ្វីជើងក្រុម Bayern Munich ក្នុងលទ្ធផល ៣-០ បើគិតទាំងពីរជើងទៅ។ បរាជ័យនេះដែរ បានធ្វើឱ្យអ្នកវិភាគជាច្រើនមើលឃើញថា PSG ចាយលុយទិញកីឡាករល្អៗចូលក្រុមជាច្រើន ប៉ុន្តែពួកគេនៅតែមិនអាចសម្រេចក្ដីស្រមៃបានដដែល។ ក្នុងពាន UEFA Champions League ក្រុមមួយនេះ មិនអាចលេងបានល្អដូចអ្វីដែលអ្នកគាំទ្រចង់បាននោះទេ បើទោះជាមាន Messi និង Mbappe នៅតំបន់ប្រយុទ្ធក៏ដោយ។
ក្នុងនោះដែរ លោក Jamie Carragher ដែលជាអ្នកវិភាគមួយរូបបានចេញមុខមកនិយាយដែរថា៖ “ខ្ញុំពិតជាមិនចូលចិត្តក្បួនលេងរបស់ PSG នោះទេ គ្រប់យ៉ាងតែម្ដង។ នេះមិនមែនជាក្រុមឡើយ វាពិតជារញ៉ែរញ៉ៃ។ ៥ឆ្នាំ ក្នុងចំណោម៧ឆ្នាំមកនេះ ពួកគេបានធ្លាក់ចេញនៅត្រឹម១៦ក្រុមចុងក្រោយ។ ពួកគេចាយលុយច្រើនជាងនរណាទាំងអស់ ពួកគេមានកីឡាករល្អបំផុតនៅលើលោកនេះទៀត។ ខ្ញុំបានប្រាប់ទៅ Mbappe តាំងពីមុនមកថាគេគួរតែចេញពី PSG បើចង់ឈ្នះពាននេះ ទៅ Real Madrid កាន់តែឆាប់កាន់តែល្អ។ ពួកគេមិនមានសមត្ថភាព អាចទៅក្បែរក្នុងការឈ្នះ Champions League បានឡើយ”៕