ក្រុមខ្លាំងបារាំង PSG បានធ្លាក់ចេញពីពានរង្វាន់ UEFA Champions League ទៅហើយនៅត្រឹមវគ្គ១៦ក្រុមចុងក្រោយ បន្ទាប់ពីបរាជ័យក្រោមថ្វីជើង Bayern Munich ក្នុងលទ្ធផល ២-០ ទៀតនៅយប់មិញ។
ក្នុងជំនួបជើងទី២នៅទឹកដីអាល្លឺម៉ង់យប់មិញនេះដែរ ក្រុម PSG នៅតែមិនអាចរកគ្រាប់បាល់ទល់ក្រុម Bayern Munich បានដដែល។ ដោយកាលពីជើងទី១កន្លងទៅ ពួកគេចាញ់ ១-០ ទៅហើយ ស្របពេលនៅជើងទី២យប់មិញនេះទៀត ក៏បន្ដបរាជ័យទៀតក្នុងលទ្ធផល ២-០។ សរុបទាំងពីរជើងមក ក្រុម Bayern Munich បានយកឈ្នះលើក្រុម PSG បានដល់ទៅ ៣-០ ឯណោះ។
PSG ដែលពោរពេញទៅដោយកីឡាករឆ្នើមៗដូចជា Lionel Messi , Mbappe ជាដើមនោះ នៅតែមិនអាចសម្រេចបំណងក្នុងការឈ្នះពានរង្វាន់ UEFA Champions League បានដដែល។ ដោយបរាជ័យនារដូវកាលនេះ ក៏ទំនងជាអាចនឹងធ្វើឱ្យការចង់បន្ដកុងត្រាថ្មីដល់ Messi ពិបាកផងដែរ៕