ខ្សែប្រយុទ្ធ Kylian Mbappe បានអះអាងថាអនាគតរបស់គេនៅ PSG គឺមិនអាស្រ័យទៅលើលទ្ធផលនៃពានរង្វាន់ UEFA Champions League នោះទេ។
ក្រុម PSG នឹងត្រូវប្រកួតទល់ក្រុម Bayern Munich នៅរាត្រីនេះហើយ ក្នុងពានរង្វាន់ UEFA Champions League ជើងទី២។ ខណៈដែលជើងទី១កន្លងទៅ នៅទឹកដីបារាំង ក្រុមអ្នកមានមួយនេះបានបរាជ័យក្នុងលទ្ធផល ១-០ ទៅហើយ។ ដូច្នេះនៅរាត្រីនេះ ពួកគេទាមទារឱ្យឈ្នះដាច់ខាត ទើបអាចមានឱកាសឡើងទៅវគ្គ៨ក្រុមចុងក្រោយបាន។ ទន្ទឹមគ្នានេះដែរ ក្រុម PSG ក៏នឹងបាត់ខ្សែប្រយុទ្ធសំខាន់ម្នាក់ផងដែរ ព្រោះ Neymar បានរងរបួសកជើងទៅហើយ ត្រូវវះកាត់និងសម្រាករហូតដល់ចប់រដូវកាលនេះឯណោះ។
មុនការប្រកួតក៏សំខាន់នេះកើតឡើង Mbappe បានបង្ហាញចំណាប់អារម្មណ៍ដែរថា៖ “ខ្ញុំមិនគិតថាលទ្ធផលនៅ Champions League ប៉ះពាល់ដល់អនាគតរបស់ខ្ញុំនោះទេ។ ប្រសិនបើខ្ញុំពឹងផ្អែកលើរឿងនេះ ខ្ញុំប្រហែលជាចេញពី PSG យូរមកហើយ។ ខ្ញុំនៅទីនេះ ខ្ញុំសប្បាយចិត្ត ហើយខ្ញុំក៏មិនគិតអ្វីក្រៅពីជួយ PSG ឱ្យឈ្នះការប្រកួត និងជោគជ័យនោះទេ”៕