លោក Graham Potter បានចាត់ទុកការប្រកួតជើងទី២ UCL នៅរាត្រីនេះ គឺជារាត្រីពិសេសសម្រាប់ក្រុមតោខៀវ Chelsea ព្រោះលោកជឿជាក់ថាក្រុមនឹងអាចឡើងទៅវគ្គ៨ក្រុមចុងក្រោយបាន។
កាលពីជើងទី១កន្លងទៅ ក្រុម Chelsea បានបរាជ័យក្រោមថ្វីជើងក្រុម Dortmund រួចទៅហើយក្នុងលទ្ធផល ១-០ នៅទឹកដីអាល្លឺម៉ង់។ ដោយឡែកនៅជើងទី២ដែលធ្វើឡើងនៅទឹកដីអង់គ្លេសវិញនេះ លោក Potter សង្ឃឹមថាក្រុមនឹងធ្វើឡើងបានល្អ ជាមួយជ័យជម្នះឡើងទៅវគ្គ៨ក្រុមចុងក្រោយនៃពានរង្វាន់ UEFA Champions League បាន។
លោក Potter ដែលទើបដឹកនាំក្រុម Chelsea ឈ្នះការប្រកួតកាលពីចុងសប្ដាហ៍កន្លងទៅនេះ បាននិយាយមុនការប្រកួតទល់ក្រុម Dortmund ថា៖ “វាជាការប្រកួតធំ ជាការប្រកួតដ៏រំភើប។ នេះជាឱកាសសម្រាប់យើងដើម្បីឡើងទៅវគ្គ៨ក្រុមចុងក្រោយ Champions League ។ វានឹងក្លាយជារាត្រីពិសេស។ គំនិតរបស់យើងគឺវិជ្ជមាននិងព្យាយាមយកឈ្នះការប្រកួតឱ្យបាន”។ ក្នុងការប្រកួតនៅរាត្រីនេះដែរ ក៏អ្នកគាំទ្រអាចនឹងឃើញវត្តមានរបស់ Kante វិញផងដែរ ក្រោយពីរូបគេបានរងរបួសសម្រាករយៈពេល៦ខែមកហើយ៕