ខ្សែប្រយុទ្ធ ចាន់ វឌ្ឍនាកា បានបង្ហាញខ្លួនឱ្យក្រុមបឹងកេតវិញហើយក្នុងពានរង្វាន់ League Cup ក្រោយពីមានបញ្ហារបួសជាច្រើនខែមកនេះ។
ក្រុមបឹងកេត បានយកឈ្នះក្រុមកងយោធពលខេមរភូមិន្ទ (ទ័ព) ៤-៣ កាលពីម្សិលមិញ។ ក្នុងការប្រកួតនេះដែរ គេបានឃើញវត្តមានរបស់កំពូលខ្សែប្រយុទ្ធ វឌ្ឍនាកា ចូលទីលានវិញហើយ ដោយប្ដូរចូល ហើយនេះក៏ជាការបង្ហាញខ្លួនជាលើកដំបូងផងដែរនៅប្រមាណជាង១ឆ្នាំមកនេះ ពោលគឺក្រោយពីគេមានបញ្ហារបួសជង្គង់ធ្ងន់ធ្ងរ។ មួយវិញទៀត ជ័យជម្នះនៅម្សិលមិញក៏ជាការឈ្នះលើកដំបូងរបស់បឹងកេតនាឆ្នាំ២០២៣នេះ ឬអាចនិយាយបានថាក្រោមការដឹកនាំរបស់គ្រូបង្វឹកថ្មីលោក Clement Teo។
វឌ្ឍនាកា ក្រោយពីចប់ការប្រកួតក៏បានបង្ហាញចំណាប់ដែរថា៖ មិនមែនជាពេលវេលាល្អឥតខ្ចោះ ប៉ុន្តែជាពេលចាប់ផ្ដើមនឹងជាពេលវេលាជួយដាស់តឿនក្រុម អរគុណគ្រប់គ្នាសម្រាប់ថ្ងៃនេះ។ បឹងកេត ឆ្លងកាត់៣ប្រកួតមកនេះក្នុងពូល A ពួកគេទើបមាន៣ពិន្ទុប៉ុណ្ណោះ។ ស្របពេលក្រុមកំពូលតារាងគឺវិសាខា លេង៣ប្រកួត ឈ្នះទាំង៣ប្រកួតពេញតែម្ដង។ ក្រុមកងយោធពលខេមរភូមិន្ទ (ទ័ព) មាន៩ពិន្ទុដែរ តែលេងដល់ទៅ៤ប្រកួតទៅហើយ៕