លោក Erik ten Hag បាននិយាយថាសមាជិកក្រុមបិសាចក្រហម Manchester United លេងដូចមិនធ្លាប់លេងជាមួយគ្នាពីមុនមកអីចឹង លេងមិនយល់ចិត្តគ្នាសោះ ក្នុងការប្រកួតដែលចាញ់ក្រុម Liverpool ៧-០ នៅយប់មិញនេះ។
ជារឿងគួរឱ្យភ្ញាក់ផ្អើលមែនទែននៅពេលក្រុមកំពុងឡើងជើង Man Utd បែរជាចាញ់ក្រុម Liverpool រហូតដល់ទៅ ៧-០ នោះនៅទឹកដី Anfield ។ នេះជាកំណត់ត្រាចាញ់យ៉ាងអាម៉ាស់មួយសម្រាប់ក្រុមរបស់លោក Erik ten Hag ។ ខណៈដែលក្រុមនេះកំពុងលេងបានល្អផង បែរជាមកចាញ់យ៉ាងទក់សាច់បែបនេះ ហើយងាកទៅទម្រង់លេងវិញ ក្រុមទាំងមូលលេងមិនយល់ចិត្តគ្នា ដូចកីឡាករមិនធ្លាប់លេងជាមួយគ្នាពីមុនមកអីចឹង។
លោក Ten Hag និយាយក្រោយចប់ការប្រកួតថា៖ “នៅតង់ទី២ វាមិនមែនជាយើងនោះទេ។ វាមិនមែនកម្រិតរបស់យើងឡើយ យើងមិនបានលេងជាក្រុមទាល់តែសោះ។ យើងមិនបានធ្វើតាមការគ្រោងទុក យើងបានបាត់បង់ស្មារតី យើងមិនបានធ្វើការងាររបស់យើង។ វាពិតជាគ្មានវិជ្ជាជីវៈទាល់តែសោះសម្រាប់កីឡាករយើង”៕