លោក Jurgen Klopp បានអះអាងថាលោកសប្បាយចិត្តនៅពេលបានឃើញខ្សែប្រយុទ្ធ Marcus Rashford អាចត្រលប់មកលេងល្អឡើងវិញ ក្រោយពីរដូវកាលមុនធ្វើមិនបានល្អសោះ។
នារដូវកាលនេះ Rashford រកបាន២៥គ្រាប់ហើយឱ្យក្រុមបិសាចក្រហម Manchester United ខណៈដែលរដូវកាលមុននេះវិញ រូបគេរកបានត្រឹមតែ៥គ្រាប់ប៉ុណ្ណោះ។ ដោយមើលឃើញថាកីឡាករអង់គ្លេសរូបនេះចាប់ផ្ដើមលេងល្អដល់កម្រិតកំពូលរបស់គេវិញ ទើបបានជាលោក Klopp សរសើរ និងសប្បាយចិត្តចំពោះ Rashford បើទោះជាក្រុម Man Utd នឹងត្រូវប៉ះ Liverpool នៅរាត្រីនេះក្ដី។
លោក Klopp បាននិយាយថា៖ “ក្នុងនាមអ្នកចាត់ការ Liverpool វាពិបាកទៅរួច បើនិយាយថាអ្នកសប្បាយចិត្តនៅពេលឃើញ Man Utd ធ្វើបានល្អ។ ប៉ុន្តែខ្ញុំពិតជារីករាយមែនសម្រាប់ Rashford ដែលគេធ្វើបានល្អ ព្រោះរដូវកាលមុនគេពិតជាឆ្លងកាត់ការពិបាកពិតមែន។ គេមិនអាចលេងដល់កម្រិតរបស់ខ្លួននោះទេ។ នាពេលបច្ចុប្បន្ន Rashford ពិតជាអស្ចារ្យ ល្បឿន បច្ចេកទេស គឺមានទាំងព្រម។ គាត់ពិតជាតាំងអារម្មណ៍បានល្អក្នុងការបញ្ចប់ទី”៕