លោក Gary Neville បានប្រាប់ទៅខ្សែប្រយុទ្ធ Harry Kane ថាគួរតែផ្លាស់មកលេងនៅក្លឹប Manchester United មក ប្រសិនបើរូបគេមានបំណងចង់ឈ្នះពានរង្វាន់ក្នុងអាជីពបាល់ទាត់នោះ។
Kane ជាកីឡាករថ្នាលរបស់ Spurs នឹងមិនទាន់ផ្លាស់ទៅលេងនៅទីណានោះទេ។ មានក្លឹបជាច្រើនចង់បានគេនៅប៉ុន្មានឆ្នាំចុងក្រោយនេះ ប៉ុន្តែកីឡាករអង់គ្លេសនេះនៅតែមិនដាច់ចិត្តពីក្លឹបដើមកំណើត Spurs ដដែល។ បច្ចុប្បន្នខ្សែប្រយុទ្ធកណ្ដាលវ័យ២៩ឆ្នាំនេះ ក្លាយជាអ្នករកបានគ្រាប់បាល់ច្រើនជាងគេទៅហើយឱ្យក្លឹប Spurs រហូតដល់២៦៦គ្រាប់ឯណោះ។ តែចំនួនគ្រាប់នេះ នៅតែមិនអាចជួយឱ្យគេអាចឈ្នះពានរង្វាន់អ្វីមួយនៅឡើយទេ។
លោក Neville ក្នុងនាមជាអតីតកីឡាករលេងនៅ Premier League ច្រើនឆ្នាំនិងជម្រើសជាតិអង់គ្លេសផងនោះ បានប្រាប់ទៅ Kane ថា៖ “គាត់ជាកីឡាករអស្ចារ្យម្នាក់ គាត់មានសមត្ថភាពពិតៗ។ គាត់គួរតែដល់ពេលចាកចេញពី Spurs ហើយ ប្រសិនបើគាត់ចង់មានឱកាសឈ្នះពានរង្វាន់។ Man Utd កំពុងស្វែងរកខ្សែប្រយុទ្ធកណ្ដាលស្រាប់ ដូច្នេះជារឿងល្អសម្រាប់គាត់ក្នុងការផ្ទេរមកលេងនៅ Old Trafford ហើយក៏មានឱកាសឈ្នះពានផងដែរ”៕