លោក Carlo Ancelotti បានអះអាងថាក្រុម FC Barcelona មិនសមក្នុងការទទួលបានជ័យជម្នះ ១-០ នៅជើងទី១នៃពានរង្វាន់ Copa del Rey វគ្គពាក់កណ្ដាលផ្ដាច់ព្រ័ត្រនោះទេ។
នៅយប់មិញនេះ ឃើញថាក្រុម Real Madrid បានធ្វើឱ្យចូលទីខ្លួនឯងមួយគ្រាប់ដោយខ្សែការពារ Militao ហើយវាក៏ជាគ្រាប់បាល់ជួយឱ្យក្រុម Barcelona យកឈ្នះបានក្នុងលទ្ធផល ១-០ ផងដែរ។ ខណៈដែលការប្រកួតវិញ ឃើញថាក្រុម Real Madrid បានដាក់សម្ពាធដែរ ប៉ុន្តែមិនទទួលបានលទ្ធផលនោះទេ។ ក្រោយពីចប់ការប្រកួតដោយបរាជ័យនៅជើងទី១នេះ លោក Ancelotti មិនពេញចិត្តជាមួយលទ្ធផលឡើយ។
អ្នកចាត់ការក្រុមសញ្ជាតិអ៊ីតាលី បានអះអាងថា៖ “ច្បាស់ណាស់ Barca មិនសមទទួលបានជ័យជម្នះនោះទេប្រកួតនេះ។ ខ្ញុំគិតថានេះជាការប្រកួតមួយដែលខ្សែការពារ Real Madrid ធ្វើបានល្អបំផុតនារដូវកាលនេះ។ យើងគ្រប់គ្រងការប្រកួតជាង៦០% ប៉ុន្តែមិនស៊ុតចំគោលដៅនោះទេ”។ ក្នុងការប្រកួតនេះដែរ ក្រុម Real Madrid ស៊ុត១៣ជើង ប៉ុន្តែមិនចំគោលដៅសួម្បី១ជើង ស្របពេលក្រុម Barcelona វិញ ស៊ុតចំគោលដៅ២ជើង និងមានគ្រាប់បាល់១គ្រាប់៕