លោក Carlo Ancelotti បានចាត់ទុកពានរង្វាន់ Copa del Rey ជាពានសំខាន់សម្រាប់ក្រុម Real Madrid នៅរដូវកាលនេះ ក្រោយពីបានឡើងដល់វគ្គពាក់កណ្ដាលផ្ដាច់ព្រ័ត្រ។
កាលពីពេលកន្លងទៅនេះ ក្រុម Real Madrid បានចាញ់ក្រុម FC Barcelona ក្នុងលទ្ធផល ៣-១ នៅពានរង្វាន់ Spanish Super Cup ។ យ៉ាងណាមិញ នៅរាត្រីនេះ ក្រុមទាំងពីរនឹងត្រូវតតាំងគ្នាទៀតនៅវគ្គពាក់កណ្ដាលផ្ដាច់ព្រ័ត្រ Copa del Rey ម្ដង នៅជើងទី១ វេលាម៉ោង៣រំលងអាធ្រាត្រ។ ដោយពានរង្វាន់មួយនេះ ត្រូវបានលោក Carlo Ancelotti អ្នកចាត់ការក្រុម Real Madrid ចាត់ទុកថាជាពានរង្វាន់សំខាន់មួយដែលក្រុមរបស់លោកចង់បាន។
អ្នកចាត់ការសញ្ជាតិអ៊ីតាលីបាននិយាយថា៖ “យើងមានទំនុកចិត្ត ដូចរាល់ដង។ យើងរីករាយពីការប្រកួតនេះ វាជាការប្រកួតដែលនឹងធ្វើឱ្យអ្នកគាំទ្រសប្បាយចិត្តក្នុងការទស្សនា។ វាជាការប្រកួតសំខាន់។ យើងកាន់តែកៀកក្នុងការឈ្នះពានរង្វាន់មួយនេះ ហើយវាពិតជាសំខាន់សម្រាប់យើង បើទោះជាការប្រកួតទល់ Barcelona មិនទាន់កាត់សេចក្ដីក្រុមណាឈ្នះពានមែន ប៉ុន្ដែវាពិតជាសំខាន់សម្រាប់យើងក្នុងប្រកួតវគ្គនេះ”៕