លោក Xavi អ្នកចាត់ការក្រុម FC Barcelona បាននិយាយថាក្រុមគូប្រជែង Real Madrid គឺជាក្រុមមានសង្ឃឹមច្រើនក្នុងការឈ្នះពានរង្វាន់ Copa del Rey នារដូវកាលនេះ។
នៅម៉ោង៣រំលងអាធ្រាត្រនេះ ក្រុម Real Madrid នឹងត្រូវប្រកួតជាមួយក្រុម FC Barcelona ហើយ សម្រាប់វគ្គពាក់កណ្ដាលផ្ដាច់ព្រ័ត្រជើងទី១នៃពានរង្វាន់ Copa del Rey ។ នេះជាការប្រកួត El Clasico ថ្មីទៀតសម្រាប់ក្រុមទាំងពីរ ខណៈដែលកន្លងទៅ Real Madrid បានរបូតពានមួយទៅហើយគឺ Spanish Super Cup ដោយសារ FC Barcelona នេះ។
តែសម្រាប់លើកនេះវិញ លោក Xavi គិតថានឹងពិបាកក្នុងការយកឈ្នះ Real Madrid មិនខាន ព្រោះក្រុមរបស់លោកមានបញ្ហាកីឡាករសំខាន់៣នាក់របួសទៅហើយ។ Pedri, Ousmane Dembélé និង Robert Lewandowski សុទ្ធតែមិនអាចលេងបាននៅរាត្រីនេះទេ។ លោក Xavi បាននិយាយទៀតថា៖
“ពួកគេឈ្នះពានកាលពីពេលកន្លងទៅនេះ ហើយយើងកំពុងតែកសាងក្រុមឡើងវិញ។ យើងយកឈ្នះពួកគេកាលពីឆ្នាំមុន ប៉ុន្តែក្រុម Madrid នេះក៏ទើបយកឈ្នះ Liverpool នៅទឹកដី Anfield យ៉ាងធំធេងផងដែរ។ ខ្ញុំត្រូវតែនិយាយត្រង់ ខ្ញុំឃើញពួកគេ ជាក្រុមមានសង្ឃឹមច្រើន។ យើងកំពុងនិយាយពីក្រុមជើងឯក La Liga និង Europe”៕