លោក Erik ten Hag ថាក្រុមបិសាចក្រហម Manchester United លែងគិតរឿងអបអរពានរង្វាន់ Carabao Cup ទៀតហើយ ពោលគឺត្រូវផ្ដោតលើពានរង្វាន់ដទៃទៀតវិញ។
ក្រុមបិសាចក្រហម Manchester United នឹងត្រូវប្រកួតជាមួយក្រុម West Ham នៅជុំទី៥នៃពានរង្វាន់ FA Cup នៅរាត្រីនេះហើយ។ នេះជាពានរង្វាន់នៅសល់ក្នុងដៃមួយទៀតរបស់ក្រុម Man Utd ដែលរំពឹងថានឹងមានឱកាសប្រជែងយក ក្រោយពីពួកគេទើបលើកពាន Carabao Cup ហើយកាលពីចុងសប្ដាហ៍កន្លងទៅនេះ។
លោក Ten Hag បាននិយាយមុនការប្រកួតថា៖ “យើងបានត្រលប់មកហ្វឹកហាត់ពេញលេញវិញហើយ។ មិនមានការអបអរពានរង្វាន់ Carabao Cup អ្វីទៀតទេ។ កីឡាករដែលត្រូវប្រមូលកម្លាំងក៏បានចូលហ្វឹកហាត់វិញ។ យើងត្រូវប្រឹងប្រែងឱ្យអស់ពីសមត្ថភាពក្នុងការប្រកួតនៅរាត្រីនេះ”។
រំលឹកថា Man Utd ក្រោមការដឹកនាំរបស់លោក Erik ten Hag បានឈ្នះពានរង្វាន់វិញហើយក្នុងរយៈពេល៦ឆ្នាំចុងក្រោយមកនេះ ពោលគឺ Carabao Cup កាលពីចុងសប្ដាហ៍កន្លងទៅ។ ក្រុមបិសាចក្រហមនេះ នៅសល់ពាន៣ទៀតដែលសុទ្ធតែមានឱកាសឈ្នះគឺ FA Cup Premier League និង Europa League ៕