ខ្សែប្រយុទ្ធ Lionel Messi បានឈ្នះពានរង្វាន់ FIFA Best Player of The Year ហើយកាលពីយប់មិញនេះ ក្រោយពីទទួលបានសំឡេងគាំទ្របោះឆ្នោតឱ្យច្រើនជាង Kylian Mbappe ទៅទៀត។
ក្នុងឱកាសឈ្នះពានរង្វាន់កីឡាករល្អបំផុតរបស់ FIFA នោះដែរ ខ្សែប្រយុទ្ធវ័យ៣៥ឆ្នាំបានបង្ហាញចំណាប់អារម្មណ៍ថា៖ “នេះជាឆ្នាំឆ្គួតបំផុតសម្រាប់ខ្ញុំ។ ខ្ញុំបានសម្រេចក្ដីស្រមៃដ៏ធំរបស់ខ្ញុំ បន្ទាប់ពីប្រកួតជាច្រើន ស្វែងរកជាច្រើនឆ្នាំ និងការតាំងចិត្តជាយូរឆ្នាំមកហើយ។ វាជារឿងស្រស់ស្អាតបំផុតដែលបានកើតមានឡើងសម្រាប់ខ្ញុំក្នុងអាជីពបាល់ទាត់នេះ។ ខ្ញុំពិតជាអរគុណដល់មិត្តរួមក្រុមទាំងអស់ដែលបានសម្រេចវាឡើង។ បើគ្មានពួកគេ ខ្ញុំក៏មិនអាចមកឈរនៅទីនេះដែរ”។
Messi ជាប្រធានក្រុមជម្រើសជាតិអាហ្សង់ទីនដែលបានលើកពាន FIFA World Cup 2022 កន្លងទៅ។ ក្នុងឆ្នាំមុននេះ រូបគេរកបាន២៧គ្រាប់ក្នុងការបង្ហាញខ្លួនសរុប៤៩ប្រកួតទាំងនៅជម្រើសជាតិនិងក្លឹបអាជីព។ អតីតកីឡាករ Barcelona រូបនេះ ក៏ជាប់កំណត់ត្រាអស្ចារ្យមួយនៅ World Cup ផងដែរ ដោយក្លាយជាកីឡាករដំបូងរកបានគ្រប់ការប្រកួតនៅវគ្គចាញ់ធ្លាក់៕