ពានរង្វាន់កីឡាករល្អបំផុត FIFA Best Player of The Year បានប្រកាសលទ្ធផលអ្នកឈ្នះហើយ គឺបានទៅលើខ្សែប្រយុទ្ធ Lionel Messi របស់ជម្រើសជាតិអាហ្សង់ទីន។
Messi ទទួលបានសំឡេងគាំទ្រច្រើនជាង Kylian Mbappe និង Karim Benzema ក្រោយពីកីឡាករអាហ្សង់ទីនរូបនេះឈ្នះពានរង្វាន់ FIFA World Cup 2022 និងទទួលបានបាល់មាសថែមទៀតក្នុងនាមជាកីឡាករល្អម្នាក់ក្នុងព្រឹត្តិការណ៍នេះ។ យ៉ាងណាមិញ ការបោះឆ្នោតស្វែងរកអ្នកឈ្នះនៃពានរង្វាន់ FIFA នេះដែរ គឺធ្វើឡើងពីសំណាក់គ្រូបង្វឹកតាមជម្រើសជាតិនានា និងប្រធានក្រុមផងដែរ។ ដូច្នេះក៏មានគ្រូបង្វឹកកម្ពុជា និងប្រធានក្រុមកម្ពុជាចូលរួមបោះឆ្នោតដូចគ្នា។
សម្រាប់លោក Ryu Hirose គ្រូបង្វឹកជម្រើសជាតិកម្ពុជា មិនបានបោះឱ្យ Messi នៅលេខ១មុនគេនោះទេ ដោយលោកបោះឱ្យ Mbappe លេខ១ Messi លេខ២ និង Luka Modric នៅចំណាត់ថ្នាក់លេខ៣។ ស្របពេលប្រធានក្រុម សឿយ វិសាល វិញ បោះឱ្យ Mbappe លេខ១ Benzema លេខ២ និង Kevin De Bruyne នៅចំណាត់ថ្នាក់លេខ៣៕