ខ្សែបម្រើ Bruno Fernandes បាននិយាយថារូបគេចង់ឈ្នះពានរង្វាន់ជាច្រើនទៀតជាមួយក្រុមបិសាចក្រហម Manchester United ក្រោយពីទើបលើកពាន Carabao Cup កាលពីយប់មិញនេះ។
Bruno បានដើរតួជាប្រធានក្រុមជាច្រើនប្រកួតមកហើយ ក្រោយពី Magurie ត្រូវបានលោក Erik ten Hag ដាក់ឱ្យអង្គុយកៅអីបម្រុង។ ខ្សែបម្រើព័រទុយហ្គាល់រូបនេះបានបង្ហាញទម្រង់លេងល្អមែនទែន ក្នុងនាមជាអ្នកដឹកនាំក្រុមលើទីលានផង និងចុះមកជួយការពារក្រុមថែមទៀត។ ទន្ទឹមគ្នានេះដែរ Bruno ក៏រំពឹងទៀតថានាពេលខាងមុខ រូបគេនឹងបន្ដជួយក្រុមក្នុងការឈ្នះពានបានជាច្រើនទៀត។
អតីតកីឡាករ Sporting ខាងលើនិយាយថា៖ “ចុងក្រោយ យើងទទួលបានពានរបស់ពួកយើងហើយ។ ខ្ញុំចង់ឈ្នះពានរង្វាន់ជាច្រើនទៀត។ នៅរដូវកាលនេះ ជារដូវកាលដ៏អស្ចារ្យសម្រាប់យើង ប៉ុន្តែយើងចង់ធ្វើឱ្យបានល្អជាងនេះទៅទៀត។ វាតែងតែមិនគ្រប់គ្រាន់ទេសម្រាប់ក្លឹបមួយនេះ។ យើងតែងតែទាមទារឱ្យច្រើនជាងនេះ”៕