លោក Graham Potter បានទទួលស្គាល់ថាលទ្ធផលបរាជ័យផ្ទួនៗគ្នាបែបនេះ គឺមិនមែនជាអ្វីដែលថ្នាក់ដឹកនាំក្លឹបតោខៀវ Chelsea ចង់បាននោះទេ។
ក្រុម Chelsea បន្ដបរាជ័យ៣ប្រកួតជាប់គ្នាហើយ ក្រោយពីយប់មិញចាញ់ក្រុម Spurs ក្នុងលទ្ធផល ២-០ ទៀតក្នុងពានរង្វាន់ English Premier League។ ដោយនេះសបញ្ជាក់ឱ្យឃើញថាក្លឹបដែលចំណាយប្រាក់ច្រើនបំផុតកាលពីទីផ្សារដោះដូរកីឡាករកន្លងទៅ លេង១៥ប្រកួតចុងក្រោយនេះឈ្នះបានត្រឹមតែ២ប្រកួតប៉ុណ្ណោះ ហើយបច្ចុប្បន្នក៏ធ្លាក់ដល់ពាក់កណ្ដាលតារាង Premier League ផងដែរ។
អ្នកចាត់ការ Potter របស់ក្រុម Chelsea បាននិយាយក្រោយចប់ការប្រកួតនៅយប់មិញថា៖ “វាតែងតែមានសំនួរជានិច្ចនៅពេលក្រុមធ្វើមិនបានល្អ។ ខ្ញុំទទួលស្គាល់ នេះមិនមែនជាអ្វីដែលយើងចង់បាននោះទេ ហើយថ្នាក់ដឹកនាំក៏មើលឃើញដូចគ្នា។ យើងកំពុងតែនិយាយពីការកសាងក្រុមឡើងវិញ យើងអាចមើលទៅ Arsenal ដែលដឹកនាំដោយ Mikel Arteta ។ គាត់ស្ទើរតែត្រូវបណ្ដេញចេញទៅហើយ ប៉ុន្តែពេលវេលាបានបង្ហាញថាគាត់ពិតជាអាចធ្វើបាន។ យើងត្រូវការពេលវេលា នេះជារឿងធម្មតានៃបាល់ទាត់”៕