លោក Erik ten Hag បានអះអាងថាការឈ្នះពានរង្វាន់ Carabao Cup គឺជាកម្លាំងចិត្តដ៏ធំមួយសម្រាប់ក្រុម Manchester United ក្នុងការស្វែងរកនិងប្រឹងប្រែងដើម្បីឈ្នះពានដទៃទៀត។
ក្រុមបិសាចក្រហម Manchester United បានឈ្នះពានរង្វាន់ Carabao Cup ហើយ ក្រោយពីពួកគេយកឈ្នះលើក្រុម Newcastle United ក្នុងលទ្ធផល ២-០ នៅយប់មិញនេះ។ ជ័យជម្នះ២គ្រាប់នោះដែរ គឺកើតចេញពីតង់ទី១ទាំងអស់ ដែល១គ្រាប់ដំបូងធ្វើបានដោយ Casemiro និង១គ្រាប់ទៀតជាការស៊ុតរបស់ Rashford ប៉ះជើងកីឡាករ Newcastle ចូលទីខ្លួនឯង។ នេះជាពានរង្វាន់ដំបូងហើយក្នុងរយៈពេល៦ឆ្នាំមកនេះ ដែល Man Utd អាចឈ្នះពាន។
លោក Ten Hag អ្នកចាត់ការក្រុម Man Utd បាននិយាយថា៖ “យើងត្រូវតែអបអរ ព្រោះវាជាការឈ្នះពានរង្វាន់ ហើយពានរង្វាន់នេះក៏ជាកម្លាំងចិត្តបន្ថែមមួយកម្រិតទៀតសម្រាប់យើងក្នុងការប្រកួតពានដទៃទៀតដែរ។ យើងសង្ឃឹមថានឹងនឹងអាចអបអររបៀបនេះទៀតនៅពេលខាងមុខ។ យើងត្រូវតែប្រឹងបន្ដទៀតក្នុងការប្រកួតក្នុងពានរង្វាន់ដទៃទៀត”៕