ខ្សែប្រយុទ្ធ Wout Weghorst របស់ក្រុមបិសាចក្រហម Manchester United បានបង្ហាញចំណាប់អារម្មណ៍ថាក្នុងអាជីពបាល់ទាត់គេមិនដែលឈ្នះពានទេ ដូច្នេះសង្ឃឹមថានៅរាត្រីនេះអាចបង្កើតប្រវត្តិសាស្ត្រដំបូងទៅចុះ។
ក្រុមបិសាចក្រហម Manchester United នឹងមានឱកាសលើកពាន Carabao Cup នៅរាត្រីនេះ ប្រសិនបើពួកគេអាចយកឈ្នះក្រុម Newcastle United បាននៅវគ្គផ្ដាច់ព្រ័ត្រ ដែលធ្វើឡើងនៅកីឡដ្ឋាន Wembley របស់អង់គ្លេស។ នេះក៏អាចជាពានរង្វាន់ថ្មីទៀតសម្រាប់ក្រុម Man Utd ផងដែរ ព្រោះពួកគេខកខានឈ្នះពានរង្វាន់អស់រយៈពេល៦ឆ្នាំមកហើយ។
ដោយឡែក ខ្សែប្រយុទ្ធ Wout Weghorst ដែលក្រុម Man Utd ទើបនាំចូលកាលពីខែមករាកន្លងទៅ ក៏បានបង្ហាញអារម្មណ៍ផ្ទាល់ខ្លួនរបស់គេដែរថា៖ “ខ្ញុំចង់ជោគជ័យ ប៉ុន្តែខ្ញុំក៏ចង់រកគ្រាប់បាល់ឱ្យបានផងដែរ។ ខ្ញុំសង្ឃឹមថាខ្ញុំនឹងអាចធ្វើវាបាន ខ្ញុំចង់រកគ្រាប់បាល់ឱ្យបាន។ នេះជាឱកាសឈ្នះពានរង្វាន់ដំបូងសម្រាប់ខ្ញុំក្នុងអាជីពបាល់ទាត់ ខ្ញុំសង្ឃឹមថាខ្ញុំនឹងធ្វើវាបាន”៕