លោក Jurgen Klopp បានអះអាងថាក្រុមហង្សក្រហម Liverpool នឹងធ្វើការរុះរើក្រុមទ្រង់ទ្រាយធំតែម្ដងនៅរដូវក្ដៅខាងមុខនេះ ក្រោយពីរដូវកាលនេះពួកគេលេងមិនបានល្អទាល់តែសោះ។
ក្រុម Liverpool បានបរាជ័យក្រោមថ្វីជើងក្រុម Real Madrid ក្នុងលទ្ធផល ៥-២ កាលពីជើងទី១នៃពានរង្វាន់ UEFA Champions League កន្លងទៅនេះ។ តាមលទ្ធផលនេះដែរ ពួកគេពិតជាត្រូវធ្វើការធ្ងន់មែនទែនដើម្បីវាយបកឱ្យបានគ្រាប់បាល់ច្រើនវិញនៅជើងទី២ ហើយលេងនៅអេស្ប៉ាញថែមទៀតក្នុងកីឡដ្ឋាន Bernabue ។ ស្របពេលនៅលីគអង់គ្លេសវិញ ក្រុម Liverpool ក៏កំពុងប្រជែងខ្លាំងណាស់ដែរ ដើម្បីបានចូល Top4 វិញ ក្រោយពីឆ្លងកាត់ពាក់កណ្ដាលរដូវកាលមកនេះ ពួកគេលេងមិនសូវបានល្អទាល់តែសោះ។
លោក Klopp ដែលជាអ្នកចាត់ការក្រុមបាននិយាយថា៖ “យើងដឹងច្បាស់ថាយើងនឹងត្រូវធ្វើអ្វីនៅរដូវក្ដៅខាងមុខនេះ។ មានរឿងជាច្រើននឹងត្រូវផ្លាស់ប្ដូរ។ យើងមិនអាចធ្វើវានៅពេលនេះទេ ប៉ុន្តែយើងច្បាស់ក្នុងចិត្តថាយើងនឹងត្រូវធ្វើការងារច្រើននៅរដូវក្ដៅខាងមុខ។ បច្ចុប្បន្នយើងត្រូវប្រយុទ្ធដើម្បីឆ្លងកាត់ការលំបាកនេះសិន”៕