លោក Eddie Howe អ្នកចាត់ការក្រុម Newcastle United បានអះអាងថាលោកចង់ឈ្នះពានរង្វាន់ Carabao Cup នាថ្ងៃអាទិត្យនេះ ដើម្បីបង្កើតប្រវត្តិសាស្ត្រថ្មីឱ្យក្លឹបមួយនេះ។
ក្រុម Newcastle United នឹងត្រូវប្រកួតជាមួយក្រុមបិសាចក្រហម Manchester United នៅចុងសប្ដាហ៍នេះក្នុងកីឡដ្ឋាន Wembley ពានរង្វាន់ Carabao Cup វគ្គផ្ដាច់ព្រ័ត្រ។ នេះជាឱកាសជាលើកដំបូងហើយសម្រាប់ក្រុម Newcastle ក្នុងការឈ្នះពានរង្វាន់ផ្លូវការក្នុងរយៈពេល៦៧ឆ្នាំមកនេះ។ ដូច្នេះហើយ ទើបបានជាលោក Eddie ចង់សម្រេចវាឱ្យបាន ដើម្បីបង្កើតជាកំណត់ត្រាថ្មីរបស់ក្លឹប។
លោក Eddie បាននិយាយមុនការប្រកួតថាលោកក៏ធ្លាប់ជាកីឡាករម្នាក់ដែរ ប៉ុន្តែត្រូវបង្ខំចិត្តចូលនិវត្ដន៍ដោយសារតែបញ្ហារបួស។ ក្នុងនាមជាអ្នកចាត់ការក្រុមវ័យក្មេងម្នាក់ លោកពិតជាចង់សម្រេចក្ដីស្រមៃឈ្នះពានរង្វាន់ជាមួយ Newcastle United មែនទែន។ អស់រយៈពេល៦៧ឆ្នាំមកហើយ ដែលក្លឹបនេះមិនដែលឈ្នះពានទេ ដូច្នេះនៅថ្ងៃអាទិត្យនេះសមាជិកក្រុមនឹងផ្ដល់គ្រប់យ៉ាងដើម្បីសម្រេចគោលដៅឱ្យបាន៕