លោក Jurgen Klopp បានអះអាងថាលោកសុំទោសអ្នកគាំទ្រក្រុមហង្សក្រហម Liverpool ផង ព្រោះនារដូវកាលនេះលោកមិនច្បាស់ថាអាចជួយក្រុមឱ្យចូល Top4 បានឬអត់នោះទេ។
ក្រុមហង្សក្រហម Liverpool លេងមិនបានល្អសោះនៅពានរង្វាន់ English Premier League នារដូវកាលនេះ។ ពួកគេកំពុងស្ថិតនៅពាក់កណ្ដាលតារាង និងចាញ់ពិន្ទុក្រុមលេខ៤ដល់ទៅ៧ពិន្ទុឯណោះ។ ជាមួយទម្រង់លេងឡើងចុះ មិនទៀងនេះដែរ បានធ្វើឱ្យអ្នកចាត់ការក្រុម Jurgen Klopp មិនអាចធានាជាមួយអ្នកគាំទ្របានទេ ថាពួកគេនឹងអាចចូល Top4 បានលេងពានរង្វាន់ UEFA Champions League បានឬអត់។
លោក Klopp បាននិយាយថា៖ “ខ្ញុំគិតថាយើងបានលេងពានរង្វាន់ UEFA Champions League ៥ឆ្នាំជាប់គ្នាមកនេះ និងបានឡើងដល់វគ្គផ្ដាច់ព្រ័ត្របានដល់ទៅ៣ដង។ នេះជាចំណុចមួយដែលយើងធ្វើបានយ៉ាងល្អ។ តែសម្រាប់រដូវកាលនេះវិញ ខ្ញុំសុំទោស ខ្ញុំមិនអាចធានាជាមួយអ្នកគាំទ្រថាយើងនឹងបានលេងពាន UEFA Champions League បានទៀតនៅរដូវកាលក្រោយនោះទេ”៕