លោក Erik ten Hag បានចោទក្រុម Newcastle United ថាពូកែលេងស៊ីម៉ោង និងធ្វើឱ្យគូប្រកួតធុញទ្រាន់ខ្លាំងណាស់ ដែលនេះជាយុទ្ធសាស្ត្ររបស់ពួកគេផងដែរ។
ក្រុមបិសាចក្រហម Manchester United នឹងត្រូវប្រកួតជាមួយក្រុម Newcastle United នៅថ្ងៃអាទិត្យស្អែកនេះហើយ ក្នុងការប្រកួតវគ្គផ្ដាច់ព្រ័ត្រពានរង្វាន់ Carabao Cup កីឡដ្ឋាន Wembley ។ មុនជំនួបនេះដែរ លោក Ten Hag ពិតជាសរសើរក្រុមកំពុងឡើងជើង Newcastle United មែនទែន ព្រោះពួកគេជាក្រុមមួយមានផែនការលេងច្បាស់លាស់ និងពូកែធ្វើឱ្យដៃគូធុញទ្រាន់ថែមទៀតផង។
អ្នកចាត់ការដែលទើបដឹកនាំក្រុម Man Utd ទម្លាក់ Barcelona ពីពានរង្វាន់ Europa League បាននិយាយបែបនេះថា៖ “ខ្ញុំគិតថាពួកគេជាក្រុមល្អមួយ ព្រោះពួកគេលេងដោយមានគម្រោង ផែនការច្បាស់លាស់។ ពួកគេតែងតែធ្វើឱ្យគូប្រកួតធុញទ្រាន់ក្នុងការលេងជាមួយគេជានិច្ច ហើយចុងក្រោយពួកគេជាអ្នកបង្កើតឱកាសយកឈ្នះ។ យើងត្រូវច្បាស់ក្នុងចិត្តថាយើងចង់បានអ្វីពីការប្រកួតនេះ និងត្រូវយកឈ្នះឱ្យបាន”៕