ខ្សែការពារ Sergio Ramos បានប្រកាសចូលនិវត្តន៍ពីក្រុមជម្រើសជាតិអេស្ប៉ាញហើយ ក្រោយពីបាននិយាយទូរសព្ទជាមួយគ្រូបង្វឹកថ្មី និងដឹងខ្លួនថាមិនស្ថិតក្នុងគម្រោងប្រើប្រាស់ទៀតនោះទេ។
Ramos បានប្រកាសដំណឹងខាងលើនេះថា៖ “ពេលវេលាបានមកដល់ហើយ។ នេះជាពេលត្រូវលាអ្នកគាំទ្រជម្រើសជាតិទាំងអស់គ្នា។ ផ្លូវបានដល់ទីបញ្ចប់ ហើយខ្ញុំសង្ឃឹមថាគ្រប់គ្នានិងយល់ ហើយចង់ចាំអ្វីដែលយើងបានធ្វើជោគជ័យជាមួយគ្នានៅជម្រើសជាតិអេស្ប៉ាញ។ ខ្ញុំបានទូរសព្ទជាមួយគ្រូបង្វឹកបច្ចុប្បន្ន ហើយគាត់បានប្រាប់ខ្ញុំថាខ្ញុំមិនស្ថិតក្នុងគម្រោងប្រើប្រាស់ទៀតនោះទេ បើទោះជាទម្រង់លេងខ្ញុំល្អ ឬបន្ដលេងប៉ុន្មានឆ្នាំទៀតក៏ដោយ”។
កីឡាករវ័យ៣៦ឆ្នាំបានបង្ហាញខ្លួនឱ្យជម្រើសជាតិអេស្ប៉ាញតាំងពីឆ្នាំ២០០៥មក ក្នុងវ័យ១៨ឆ្នាំ។ បច្ចុប្បន្ននេះរូបគេលេងឱ្យសរុប១៨០ប្រកួត និងជាប់ឈ្មោះជាកីឡាករបង្ហាញខ្លួនឱ្យអេស្ប៉ាញច្រើនបំផុតក្នុងប្រវត្តិ ជាមួយការឈ្នះពាន World Cup ម្ដងនៅឆ្នាំ២០១០ និង Euro ២ដងនៅឆ្នាំ២០០៨ និង២០១២៕