លោក Pep Guardiola បាននិយាយបែបលេងសើចថាការប្រកួតនៅជើងទី២ទល់ក្រុម RB Leipzig ទំនងជាត្រូវដាក់ខ្សែប្រយុទ្ធ៩នាក់ហើយ ទើបអាចឈ្នះការប្រកួតបាន។
នៅយប់មិញនេះ ក្រុម Manchester City លេងបានត្រឹមស្មើជាមួយក្រុម Leipzig ក្នុងលទ្ធផល ១-១ ប៉ុណ្ណោះក្នុងពានរង្វាន់ UEFA Champions League វគ្គ១៦ក្រុមចុងក្រោយជើងទី១ បើទោះជាពួកគេគ្រប់គ្រងការប្រកួតបានច្រើនជាងក៏ដោយ។ នេះមិនខុសពីការប្រកួតកាលពីចុងសប្ដាហ៍កន្លងទៅនៅ Premier League នោះទេ ដែលក្រុមរបស់លោក Pep នេះបានត្រឹមស្មើ Forest ក្នុងលទ្ធផល ១-១ ដែរ ទោះជាគ្រប់គ្រងការប្រកួតបានពេញ៩០នាទីក្ដី។
ចំពោះលទ្ធផលបែបនេះដែរ លោក Pep បាននិយាយថា៖ “ប្រហែលនៅជើងទី២ ខ្ញុំប្រហែលជាលេងឆ្គួតបន្ដិច ដាក់ប្រយុទ្ធ៩នាក់ហើយ។ អ្នកគាំទ្ររំពឹងយើងមកទីនេះ និងអាចឈ្នះ ០-៥? វាមិនមែនជារឿងពិតនោះទេ។ ខ្ញុំសុំទោស យើងមិនអាចធ្វើវាបានឡើយ។ ការប្រកួតនេះ ក្រុមទាំងអស់សុទ្ធតែខ្លាំង។ នៅវគ្គចែកពូល ក្រុមល្អៗជាច្រើនបានធ្លាក់ចេញទៅហើយ។ វាជាការប្រកួតពិបាកមួយ”៕