ជើងខ្លាំងមកពីអ៊ីតាលី Napoli បន្ដជ័យជម្នះនិងបង្ហាញសាច់ដុំរបស់ខ្លួនក្នុងពានរង្វាន់ UEFA Champions League ទៀតហើយនៅយប់មិញ ដោយយកឈ្នះលើក្រុម Frankfurt ក្នុងលទ្ធផល ២-០ ក្នុងជើងទី១វគ្គ១៦ក្រុមចុងក្រោយ។
Napoli ជាក្រុមឈ្នះជាប់គ្នារហូតនៅប៉ុន្មានប្រកួតចុងក្រោយនេះ។ ក្នុងលីគកំពូលអ៊ីតាលី Serie A ក្រុម Napoli កំពុងឈរនៅដាច់ពិន្ទុគេតែម្ដងនៅកំពូលតារាង ខណៈដែលពានរង្វាន់ UEFA Champions League នៅយប់មិញនេះវិញ ក៏ឃើញថាធ្វើបានល្អបិទគូប្រកួតមិនឱ្យស៊ុតចូលទៀត។ ពួកគេបានយកឈ្នះលើក្រុមអាល្លឺម៉ង់ Frankfurt ២-០ ដោយរកបានពីសំណាក់កីឡាករ Victor Osimhen និង Giovanni Di Lorenzo ។
បន្ថែម១គ្រាប់ទៀត ខ្សែប្រយុទ្ធ Victor Osimhen រកបានដល់ទៅ២០គ្រាប់ហើយនារដូវកាលនេះគ្រប់ការប្រកួតទាំងអស់ឱ្យក្រុម Napoli ។ ជាមួយការមានគ្រាប់បាល់ចំណេញដល់ទៅ២គ្រាប់នេះ ក៏ជាទំនុកចិត្តខ្ពស់សម្រាប់ក្រុមនេះក្នុងការលេងនៅជើងទី២ខែក្រោយ ដើម្បីធានាបានកៅអីឡើងវគ្គ៨ក្រុមចុងក្រោយផងដែរ៕