លោក Carlo Ancelotti បានអះអាងថាការប្រកួតនៅវគ្គ១៦ក្រុមចុងក្រោយពានរង្វាន់ UEFA Champions League នៅមិនទាន់បញ្ចប់ទេ ព្រោះនៅសល់ជើងទី២ទៀតនៅខែក្រោយ។
កាលពីជើងទី១កន្លងទៅ ក្រុម Real Madrid បានយកឈ្នះលើក្រុម Liverpool បានក្នុងលទ្ធផល ៥-២ ឯណោះ ដែលជាជ័យជម្នះធំធេងមែនទែនសម្រាប់ក្រុមមកពីអេស្ប៉ាញ។ លទ្ធផលមានគ្រាប់បាល់ចំណេញដល់ទៅ៣គ្រាប់នេះ បានធ្វើឱ្យអ្នកគាំទ្រខ្លះយល់ឃើញថានៅជើងទី២ នឹងមិនពិបាកនោះទេសម្រាប់ក្រុម Real Madrid ក្នុងការឡើងទៅវគ្គបន្ដ ព្រោះពួកគេមានគ្រាប់បាល់ចំណេញច្រើនគ្រាប់ទៅហើយ។ មួយវិញទៀត លេងនៅទឹកដីអេស្ប៉ាញថែមទៀត រឹតតែធ្វើឱ្យក្រុមលោក Carlo Ancelotti កាន់តែមានសង្ឃឹមច្រើន។
តែទោះជាយ៉ាងនេះក្ដី បើតាមលោក Ancelotti វិញ មើលឃើញថា៖ “វាជាជ័យជម្នះប្រវត្តិសាស្ត្រ ព្រោះយើងរបូត២គ្រាប់មុន ប៉ុន្តែអាចវាយបកឡើងវិញបាន។ យើងមិនដែលបោះបង់នោះទេ Real Madrid តែងតែជឿជាក់ និងផ្លាស់ប្ដូរការប្រកួត។ តែនេះគ្រាន់តែជើងទី១ប៉ុណ្ណោះ យើងនៅសល់១ជើងទៀត យើងត្រូវផ្ដោតអារម្មណ៍សម្រាប់ជើងទី២ ព្រោះវាអាចនឹងធ្វើឱ្យយើងពិបាកវិញក៏ថាបាន”៕