ខ្សែប្រយុទ្ធ Karim Benzema បានអះអាងថាក្រុម Real Madrid ចង់បានពានរង្វាន់ UEFA Champions League ម្ដងទៀតនៅឆ្នាំនេះ ក្នុងនាមជាក្រុមការពារតំណែងជើងឯក។
ជំនួបនៅវគ្គ១៦ក្រុមចុងក្រោយជើងទី១ទល់ក្រុម Liverpool នៅយប់មិញ ក្រុម Real Madrid ត្រូវបានក្រុមម្ចាស់ផ្ទះនាំមុខ២គ្រាប់មុនទៅហើយ ប៉ុន្តែក្រុមមួយនេះមិនបានបោះបង់នោះទេ។ ពួកគេព្យាយាមសម្រុករហូតដល់បានគ្រាប់បាល់តាមស្មើវិញនៅត្រឹមតង់ទី១។ ខណៈដែលឈានដល់តង់ទី២ ក្រុមរបស់លោក Carlo Ancelotti ក៏បន្ដដាក់សម្ពាធរហូតរកបានគ្រាប់បាល់ដល់ទៅ៣គ្រាប់បន្ថែមទៀត ដើម្បីឈ្នះការប្រកួតក្នុងលទ្ធផល ៥-២ តែម្ដង។
ក្រោយចប់ការប្រកួតនេះ Benzema ដែលជាអ្នករកបាន២គ្រាប់ដែរនៅយប់មិញ បាននិយាយថា៖ “យើងលេងដោយទំនុកចិត្ត យើងអាចបង្កើតឱកាសរកគ្រាប់បាល់ យើងចង់បានពានរង្វាន់ Champions League ម្ដងទៀត។ យើងបានលេងទៅតាមអ្វីដែលយើងចង់បាន ហើយការប្រកួតនេះក៏អ្នកគាំទ្រសប្បាយចិត្តក្នុងការទស្សនាផងដែរ”៕