លោក Alessandro Costacurta វីរបុរសបាល់ទាត់របស់ក្លឹប AC Milan បានអះអាងថានាពេលបច្ចុប្បន្ននេះ ក្រុម Napoli មានសមត្ថភាពខ្លាំងជាងក្រុម Manchester City ទៅទៀត។
Alessandro ជាអតីតខ្សែការពារឆ្នើមម្នាក់របស់ក្រុម AC Milan ដែលធ្លាប់ជួយក្លឹបនេះឈ្នះពាន UEFA Champions League រហូតដល់ទៅ៥ដងឯណោះ។ បុរសវ័យ៥៦ឆ្នាំ បានអះអាងថាលោកមើលឃើញសមត្ថភាពក្រុមនារដូវកាលនេះ គឺអ៊ីតាលីក៏ឡើងជើងខ្លាំងណាស់ដែរ។ ជាក់ស្ដែង Napoli ដែលកំពុងឈរនៅកំពូលតារាង Serie A នោះ លេចធ្លោជាងគេហើយ ទាំងសមត្ថភាពកីឡាករម្នាក់ៗ និងការលេងសហការគ្នា។
អតីតខ្សែការពារដែលចំណាយពេលជិត២០ឆ្នាំនៅក្លឹប AC Milan ចន្លោះឆ្នាំ១៩៨៦ដល់២០០៧ បាននិយាយបែបនេះថា៖ “បច្ចុប្បន្ននេះ Napoli ជាក្រុមខ្លាំងជាង Man City ទៅទៀត។ ក្លឹបនៅអង់គ្លេសតែងតែប្រយុទ្ធដើម្បីឈ្នះទាំងលីគ និង Cup ក្នុងពេលជាមួយគ្នា។ នេះជាមូលហេតុខ្លះ ដែលអាចនឹងធ្វើឱ្យពួកគេមានបញ្ហា។ ខ្ញុំជឿជាក់ថា Napoli ជាក្រុមដែលអាចស្រមៃក្នុងការឈ្នះពាន Champions League បាននៅរដូវកាលនេះ”៕