លោក Carlo Ancelotti បានអះអាងថារហូតមកដល់ពេលនេះការរើសអើងនៅតែកើតមានមកលើខ្សែប្រយុទ្ធ Vinicius ប៉ុន្តែវាមិនបានធ្វើឱ្យប៉ះពាល់ដល់អារម្មណ៍និងទម្រង់លេងរបស់គេឡើយ។
តាំងពីរដូវកាលមុន រហូតមកដល់រដូវកាលនេះ ការរើសអើងនៅតែមានជានិច្ចមកលើ Vinicius ក្នុងលីគអេស្ប៉ាញ។ ខណៈដែលការចេញលេងក្រៅវិញ ក៏ត្រូវបានគេសង្កេតឃើញថាអាចនឹងកើតមានឡើងផងដែរ ហើយខាងក្លឹប Real Madrid និងសាមីខ្លួនក៏ធ្លាប់ចេញមុខបញ្ជាក់ និងទាមទារឱ្យបញ្ឈប់រាល់សកម្មភាពទាំងអស់នោះដូចគ្នា។ ត្បិតតែមានការព្រមាននិងស្នើសុំយ៉ាងណា ការរើសអើងទៅលើកីឡាករស្បែកខ្មៅនៅតែមាន មិនថាតែនៅអេស្ប៉ាញនោះទេ ខាងអង់គ្លេសក៏ដូចគ្នា។
ត្បិតតែយ៉ាងនេះក្ដី លោក Carlo Ancelotti បានអះអាងថា៖ “ខ្ញុំសង្ឃឹមថាគេនឹងអាចរកឃើញអ្នកដែលតែងតែបង្ហាញភាពរើសអើង។ ការរើសអើងក្នុងពិភពបាល់ទាត់គឺពិតជារឿងធ្ងន់ធ្ងរ ហើយក៏គ្មានច្បាប់នៅឡើយទេសម្រាប់អ្នករើសអើងនេះ។ មិនថានៅអេស្ប៉ាញទេ គ្រប់ប្រទេសទាំងអស់សុទ្ធតែមានការរើសអើង អ្នកមិនងាយដោះស្រាយបញ្ហានេះងាយៗឡើយ។ តែសម្រាប់ Vinicius វាមិនធ្វើឱ្យគេពិបាកចិត្តអ្វីឡើយ។ Vinicius នៅតែធ្វើបានល្អ និងផ្ដោតលើការប្រកួតជានិច្ច។ យើងត្រូវរួចហើយសម្រាប់ប៉ះ Liverpool ”៕