ខ្សែប្រយុទ្ធ Neymar បានរងរបួសកជើងធ្ងន់ធ្ងរមែនទែន ក្នុងការប្រកួតដែលក្រុម PSG យកឈ្នះទៅលើក្រុម Lille ក្នុងលទ្ធផល ៣-២ កាលពីយប់មិញនេះ។
ក្នុងការប្រកួតនៅយប់មិញនេះ ក្រុម PSG ពិតជាធ្វើឱ្យអ្នកគាំទ្របុកពោះមែនទែន ព្រោះថាគ្រាប់បាល់ជ័យជម្នះរបស់ពួកគេនោះ គឺកើតចេញពីការទាត់ហ្វ្រីឃីករបស់ខ្សែប្រយុទ្ធ Lionel Messi នៅចុងម៉ោងទៅហើយ។ មួយវិញទៀតនោះ ក្រៅពីយកបាន៣ពិន្ទុនេះហើយ ក្រុម PSG ក៏កំពុងមានបញ្ហាផងដែរ។ ខ្សែប្រយុទ្ធ Neymar បានរងរបួសកជើងធ្ងន់ធ្ងរ ត្រូវលើកចេញពីទីលានទៅហើយ។
Neymar បានបង្ហាញពីការឈឺចាប់ខ្លាំងមែនទែននៅត្រង់កជើងរបស់គេ ដែលជាកន្លែងកីឡាករប្រេស៊ីលរូបនេះរងរបួសជាច្រើនលើកមកហើយ។ PSG បានអះអាងថាការពិនិត្យមើលជាជំហានដំបូងនោះ រកឃើញថាមិនមានបាក់ឆ្អឹងអ្វីនោះទេ ប៉ុន្តែពួកគេក៏ត្រូវតាមដាន៤៨ម៉ោងទៀតផងដែរ៕