លោក Erik ten Hag នៅតែបន្ដនិយាយសរសើរចំពោះខ្សែបម្រើ Frankie de Jong ថាជាកីឡាករល្អកម្រមានដដែល មុនក្រុម Manchester United របស់លោក ប៉ះ Barcelona ក្នុងពាន Europa League ។
ការបន្ដសរសើរនេះក៏មិនខុសទាស់អ្វីដែរ ព្រោះកាលពីទីផ្សារដោះដូរកីឡាករកន្លងទៅ លោក Ten Hag នេះ បានព្យាយាមទិញ De Jong ម្ដងមកហើយ ដោយកាលនោះត្រូវរូវតម្លៃគ្នាអស់ហើយ តែចុងក្រោយសាមីខ្លួនបន្ដសម្រេចចិត្តស្នាក់នៅ Barcelona បន្ដ។ ការនេះបានធ្វើឱ្យលោក Ten Hag ខកខានបានកីឡាករដែលខ្លួនពេញចិត្ត តែក៏មិនធ្វើឱ្យគម្រោងរបស់លោកប្រែប្រួលអ្វីដែរ។ ជាក់ស្ដែងនៅរដូវកាលដំបូងនេះ ឃើញថា Man Utd ក្រោមការដឹកនាំរបស់លោកមានភាពប្រសើរឡើងច្រើនទៅហើយ។
ដោយឡែកនៅរាត្រីនេះ លោកក៏ត្រូវដឹកនាំក្រុម Man Utd ទៅប៉ះក្រុម Barcelona ដល់ទឹកដីអេស្ប៉ាញផងដែរ។ មុនការប្រកួតឈានចូលមកដល់ អ្នកចាត់ការហុល្លង់ Ten Hag បាននិយាយថា៖ “Barcelona កំពុងធ្វើបានល្អ ពួកគេមានកីឡាករគុណភាព។ Frenkie ជាកីឡាករអស្ចារ្យ។ ក្លឹបណាដែលមានគាត់ជួយ នឹងល្អប្រសើរ ព្រោះគាត់មានគុណភាព។ មានគាត់នៅក្នុងក្រុម នោះក្រុមនឹងខ្លាំងជាងមុន។ ដូចដែលបានឃើញនៅឆ្នាំ២០១៩កន្លងទៅ ដែល Ajax ធ្វើបានល្អ និងគ្រប់គ្នាសុទ្ធតែភ្ញាក់ផ្អើល”៕