ជួនពេលដែល AC Milan បានយកឈ្នះ ១-០ ទៅលើមាន់ខ្នាយមាស Spurs នៅម៉ោងជាមួយគ្នានោះ ការប្រកួតក្នុងទីក្រុងប៉ារីសប្រទេសបារាំង ក៏បានកើតមានបរាជ័យរបស់ម្ចាស់ដីផងដែរ បន្ទាប់ពីក្លឹបភ្ញៀវ Bayern Munich រកបាន ១ គ្រាប់ ទៅលើ PSG។
មុនឈានដល់ការប្រកួត UCL ២ គូបន្ថែម រវាង Club Brugge-Benfica និង Dortmund-Chelsea មានផ្សាយបន្តផ្ទាល់លើទំព័រ CTS Sports យើងសូមធ្វើការរំឭកនូវរឿងរ៉ាវគួរឲ្យចាប់អារម្មណ៍ ៣ ក្នុងទឹកដី Parc des Princes កាលពីយប់មិញ៖
៣) យុវជនដែល PSG បណ្ដុះ មកប្រោសជ័យជម្នះជូន Bayern
ប្រិយមិត្តមួយចំនួនប្រហែលជាឆ្ងល់ ហេតុអ្វីកីឡាករអ្នករកបានគ្រាប់បាល់ជ័យជម្នះឲ្យក្លឹបអាល្លឺម៉ង់ គឺ Kingsley Coman បែរជាមិនបញ្ចេញស្ទាយអបអរ ទល់ PSG។ នោះក៏ដោយសារតែក្លឹបលោក Christope Galtier អតីតកាលធ្លាប់ជាផ្ទះទីមួយក្នុងអាជីពជាកីឡាករ ហើយការប្រកួតសារនេះ គឺធ្វើឡើងនៅទឹកដីកំណើត ប្រទេសបារាំងរបស់ខ្លួនទៅទៀត។
ស្លាបប្រយុទ្ធ វ័យ ២៦ ឆ្នាំ បានធំធាត់ឡើងជាមួយ PSG តាំងឈុតយុវជន វិវត្តមកឈុត U19 មុន Promote ឡើងឈុតធំ ហើយឈរជើងបាន ៣ ឆ្នាំ មុនផ្លាស់ទៅក្លឹបសេះបង្កង់ Juventus និង Bayern Munich។
តើនរណាទៅដឹងមុន ចុងក្រោយបែរអតីតយុវជន Coman ជាអ្នកបញ្ចប់ក្លឹបចាស់ខ្លួនឯងទៅវិញ ហើយវាបានកើតឡើងដល់ទៅ ២ លើក ដូចកាលឆ្នាំ ២០២០ ក៏ជាអ្នករកបានគ្រាប់បាល់ជ័យជម្នះ ជួយ Bayern បំបាក់ PSG នៅវគ្គផ្តាច់ព្រ័ត្រ ក្នុងទឹកដីប្រទេសព័រទុយហ្គាល់ ឥឡូវបកមកប្រទេសកំណើត ក៏រកបានគ្រាប់បាល់ថែមទៀត ជូន Bayern នៅវគ្គ ១៦ ក្រុមជើងទី ១។
២) Alphonso Davies អាចសម្រេចក្តីស្រមៃខ្លួនឯង
លើសតែពីការឈ្នះ អ្វីដែលកីឡាករកាណាដាចង់បានបំផុត គឺអាវរបស់ Lionel Messi។ ត្រលប់ទៅឆ្នាំ ២០២០ គ្រា Bayern បំបាក់ Barcelona ៨-២ ពេលនោះ Davies តាំងចិត្តទៅសុំអាវតារាឆ្នើមអាហ្សង់ទីនមួយសារហើយ តែមិនបានសម្រេច ហើយក៏ដឹងថា ដោយសារ Messi មានការខូចចិត្តនឹងបរាជ័យធ្ងន់ធ្ងរ។
ដល់តែសារនេះ Davies បានសាកល្បងម្តងទៀត ក៏សម្រេចបានដូចចិត្ត តែក្នុងថ្ងៃ Messi ទទួលរងបរាជ័យដូចមុន ជារួម Bayern តាមលងមកដល់ប៉ារីស ទោះកីឡាករវ័យ ៣៥ ឆ្នាំប្តូរក្លឹបថ្មីហើយក៏ដោយ។
១) Kylian Mbappe ប្រាប់តាក់តិចយកឈ្នះ Bayern នៅជើងទី ២
យុវជនឆ្នើមរបស់ PSG ប៊ិះតែនឹងរកបានគ្រាប់បាល់ទៅហើយ តែបែរពិនិត្យឃើញថា Offside ដោយប្រព័ន្ធ VAR។
យ៉ាងណាបន្តទៅជើងទី ២ ក្នុងទឹកដីប្រទេសអាល្លឺម៉ង់ សម្រាប់ Mbappe នៅតែមានសង្ឃឹមហើយបានប្រាប់សារព័ត៌មាន Canal+ ដូច្នោះថា៖ “គ្រប់គ្នាត្រូវតែមានសុខភាពល្អ គេងឲ្យបានគ្រប់គ្រាន់ ហូបចុកឲ្យបានស្រួល យើងប្រាកដនឹងអាចធ្វើអ្វីមួយនៅជើងទី ២ ជាងនេះខ្ញុំជឿថា បើយើងលេងប្រយុទ្ធខ្លាំង ប្រាកដណាស់ Bayern នឹងមិនអាចនៅស្រួលកើតទេ ហើយព្យាយាមលេងបត់បែនឲ្យលឿនៗ”៕
ប្រភព៖ បរទេស