ក្រុម Spurs នឹងត្រូវទៅប៉ះជាមួយក្រុម AC Milan នៅរាត្រីនេះហើយ ក្នុងការប្រកួតវគ្គ១៦ក្រុមចុងក្រោយនៃពានរង្វាន់ UEFA Champions League វេលាម៉ោង៣រំលងអាធ្រាត្រ។
ការប្រកួតនេះដែរ ក្រុមអង់គ្លេសអាចនឹងមានបញ្ហាកីឡាករខ្លាំងហើយ ព្រោះពួកគេនឹងអវត្តមានកីឡាកររហូតដល់ទៅ៤នាក់ឯណោះ។ Pierre-Emile Hojbjerg កំពុងជាប់បម្រាម ស្របពេល Rodrigo Bentancur មានបញ្ហារបួសសម្រាកដល់ចប់រដូវកាលនេះ ដោយសារត្រូវវះកាត់ជង្គង់។ ងាកទៅមើលខ្សែបម្រើ Yves Bissouma វិញក៏នឹងមិនបានលេងនៅរាត្រីនេះដូចគ្នាដោយសារមានបញ្ហាកជើង។ អ្នកចាំទី Hugo Lloris ក៏នឹងអវត្តមានដូចគ្នា។
លោក Conte អ្នកចាត់ការក្រុម Spurs បាននិយាយចំពោះការប្រកួតនៅរាត្រីនេះថាក្រុមរបស់លោកត្រូវតែតាំងចិត្តឱ្យបានល្អបំផុត។ នៅរាត្រីនេះ ក្រុម Spurs នឹងរងសម្ពាធច្រើន ព្រោះអវត្តមានកីឡាករសំខាន់ៗច្រើននាក់ និងលេងនៅទឹកដីអ៊ីតាលីថែមទៀត។ តែប្រសិនបើក្រុមចង់ឈ្នះ នោះពួកគេត្រូវតែខិតខំនិងលេងជាក្រុមឱ្យបានល្អបំផុត៕