លោក Julian Nagelsmann គ្រូបង្វឹកក្រុម Bayern Munich បានអះអាងថាមានសង្ឃឹមត្រឹម៥០-៥០ ប៉ុណ្ណោះក្នុងការប្រកួតជាមួយក្រុម PSG នៅវគ្គ១៦ក្រុមចុងក្រោយពាន UEFA Champions League នេះ។
ក្នុងបទសម្ភាសន៍មុនការប្រកួតនៅរាត្រីនេះ លោក Julian Nagelsmann បាននិយាយថា៖ “ឱកាសមាន៥០-៥០ សម្រាប់ក្រុមទាំងពីរ។ Bayern នឹងប្រឹងលេងឱ្យបានល្អ។ ក្ដីស្រមៃរបស់ខ្ញុំមួយគឺចង់ឈ្នះពាន UEFA Champions League នេះ។ PSG នឹងមានកីឡាករពេញជើង។ Mbappe និង Messi បានចូលហាត់វិញហើយ ដូច្នេះគាត់នឹងអាចចូលលេង។ ពួកគេជាកីឡាករដែលបង្កគ្រោះថ្នាក់បានគ្រប់ពេល។ សម្រាប់ Messi វិញ គាត់ជាកីឡាករដែលដឹងពីរបៀបលេងយ៉ាងល្អ បើទោះជាគាត់បានហាត់តិចក៏ដោយ”។
រំលឹកថាកាលពីឆ្នាំ២០១៩-២០២០ កន្លងទៅ ក្រុមទាំងពីរបានប៉ះគ្នាម្ដងហើយដែរនៅវគ្គផ្ដាច់ព្រ័ត្រពានរង្វាន់ UEFA Champions League ដោយកាលនោះ Bayern យកឈ្នះក្នុងលទ្ធផល ១-០ ដោយកីឡាករ Kingsley Coman។ នៅពានរង្វាន់ Champions League នេះ ក្រុម Bayern គឺជាក្រុមកំណាចមួយផងដែរ ពួកគេតែងតែធ្វើបានល្អនៅវគ្គ១៦ក្រុមចុងក្រោយនេះ៕