ក្រុមកាំភ្លើងធំ Arsenal បន្ដខាតបង់ពិន្ទុទៀតហើយ ក្រោយពីពួកគេលេងបានត្រឹមស្មើជាមួយក្រុម Brentford ក្នុងលទ្ធផល ១-១ ប៉ុណ្ណោះនៅក្របខណ្ឌ English Premier League។
ក្នុងការប្រកួតនេះដែរ ក្រុមកំពូលតារាង Arsenal រកបានគ្រាប់បាល់នាំមុខទៅហើយនៅនាទី៦៦ ដោយកីឡាករ Trossard ប៉ុន្តែវាមិនបានធ្វើឱ្យពួកគេទទួលបានជ័យជម្នះនោះទេ។ នៅនាទី៧៤ កីឡាករ Toney ក៏រកបានគ្រាប់បាល់តាមស្មើវិញបានទៀត។ ដូច្នេះការប្រកួតនេះ ក្រុមទាំងពីរបានត្រឹមចែកគ្នាម្នាក់មួយពិន្ទុប៉ុណ្ណោះ។ ត្បិតតែយ៉ាងនេះក្ដី ក្រុមកាំភ្លើងធំនៅតែបន្ដឈរកំពូលតារាងដដែល ដោយនាំមុខទៅលើក្រុមលេខ២ Man City រហូតដល់៦ពិន្ទុឯណោះ។
ដោយបច្ចុប្បន្ន Arsenal នៅលេខ១ មាន៥១ពិន្ទុ ស្របពេលក្រុមលេខ២ Man City វិញ មាន៤៥ពិន្ទុ។ ក្រុមនៅចំណាត់ថ្នាក់លេខ៣ Man Utd មាន៤៣ពិន្ទុ។ ការប្រជែងពាននៅ Premier League នៅតែបន្ដ ស្របពេលក្រុម Arsenal ក៏នឹងត្រូវប៉ះក្រុម Man City នៅសប្ដាហ៍ក្រោយផងដែរ៕