ស្ថានការណ៍របស់ក្លឹប Manchester City នៅពេលចុងក្រោយ គឺមិនខុសពីរឿងហេតុកាលឆ្នាំ ២០២០ ឡើយ តែអាចនឹងធ្ងន់ធ្ងរជាងមុនបន្ថែមទៀត ដ្បិតអីកំពុងរងការចោទប្រកាន់ដល់ទៅ ១១៥ ករណី ពាក់ព័ន្ធការល្មើសច្បាប់ហិរញ្ញវត្ថុ។ មិនត្រឹមតែអាចនឹងអស់កៅអីនៅ Champions League ថាមិនត្រូវសូម្បីឈ្មោះឈរជើងនៅ Premier League ក៏រក្សាមិនគង់ផង ប្រសិនជារកឃើញថា ក្លឹបបានដើរខុសដូចការចោទប្រកាន់មែននោះ។
ទាក់ទិននឹងបញ្ហានេះ អ្នកចាត់ការលោក Pep Guardiola ធ្លាប់បានបកស្រាយហើយ ថាលោកមិនកាន់ជើងឬឈរខាងណាទេ បើក្លឹបពិតធ្វើខុស ហើយបានកុហកគ្រប់យ៉ាង នោះលោកនឹងចាកចេញដោយគ្មានការស្តាយក្រោយ ហើយក៏គ្មានសូម្បីពាក្យថាជា “មិត្ត” ទុកហៅនៅពេលក្រោយនោះដែរ។
ឥឡូវងាកមកស្ថានភាពកីឡាករ មិនទាន់ជាលេចលឺច្រើនឡើយអំពីការចង់ចាកចេញ តែមួយរឿងលេចលឺដំបូង គឺពាក់ព័ន្ធអនាគតតារាឆ្នើមប្រចាំក្លឹបជាខ្សែប្រយុទ្ធជួរមុខ Erling Haaland ដែលទើបផ្ទេរមកចូលរួម មិនទាន់បានមួយរដូវកាលស្រួលបួលផង។
បើទោះបីស្ថិតិការរកគ្រាប់បាល់ សមិទ្ធផលសម្រេចបាននៅ City ឃើញថាកើតផ្លែផ្កាយ៉ាងឆាប់រហ័ស តែយុវជនសញ្ជាតិន័រវេសហាក់រើបម្រាស់គិតចង់ចាកចេញដ៏ប្រញាប់ប្រញាល់នៅពេលខាងមុខនេះហើយ ដោយឈរលើហេតុផលធំ ២ ទី ១) គឺការមានទំនាក់ទំនងមិនសូវល្អរវាងអ្នកចាត់ការលោក Pep Guardiola និងទី ២) ពាក់ព័ន្ធភាពមិនប្រាកដប្រជាអំពីអនាគតរបស់ក្លឹបពេលទៅមុខ ក្រោយកើតមានបញ្ហាល្មើសច្បាប់ Financial Fair Play ជាថ្មី។
គួរឲ្យដឹងថា កន្លងមកសូម្បីអតីតជើងចាស់លោក Dietmar Hamann ក៏មិនចង់ជឿដែរនាដំណាក់កាលដំបូងថា Haaland ជ្រើសការផ្ទេរមកក្លឹបសំពៅមាស។ លោកបានលើកឡើងប្រាប់កាសែត TalkSPORT យ៉ាងដូច្នោះថា៖ “ខ្ញុំអត់ធ្លាប់គិតទេថា Haaland មក City ព្រោះអីគេមិនធ្លាប់ជាកីឡាករដែល Guardiola ចង់បាននោះឡើយ”។
ឥឡូវពេលវេលានៃការចាកចេញរបស់កីឡាករ ក៏ទំនងចូលមកដល់ ហើយបង្ខំចង់ចាកចេញឲ្យបានមុនឆ្នាំ ២០២៤ ពោលមុនកិច្ចព្រមព្រៀងតម្លៃផ្តាច់កុងត្រា ២០០ លានអឺរ៉ូ ត្រូវចាប់បើកដំណើរការ ម្ល៉េះបើអូសបន្លាយហួសដល់ពេលនោះ ទោះចង់ចាកចេញក៏អាចពិបាកដែរ។
បើតាមសារព័ត៌មានជាច្រើនចុះផ្សាយ ទ្រនំបន្ទាប់ដែលយុវជនវ័យ ២២ ឆ្នាំ គិតចង់ទៅចូលរួម គឺមានតែ ២ ប៉ុណ្ណោះ ហើយក៏ជាក្លឹបអាចមានលទ្ធភាពត្រងយក មិនថាតែលើតម្លៃផ្ទេរ និងទំហំប្រាក់ឈ្នួល នោះរួមមានក្លឹបសេដ្ឋីបារាំង Paris Saint-Germain និងក្លឹបស្តេចពាន UCL ១៤ សម័យកាល Real Madrid។
ចំពោះតម្លៃផ្ទេរចេញ ដែល City អាចបើកភ្លើងខៀវឲ្យមនុស្សយន្តខាងលើចាកចេញគឺអាចចន្លោះពី ១៥០ ទៅ ១៧៥ លានអឺរ៉ូ ឬអាចឈានដល់ជិត ២០០ លានអឺរ៉ូ ស៊ីសងលើការចរចាក្នុងលក្ខខណ្ឌសមស្របណាមួយ។
រំឭកអំពីស្ថិតិបង្ហាញខ្លួនរដូវកាលនេះបន្តិច ឃើញថាកីឡាករជំនាញជើងឆ្វេងធ្វើបានល្អខ្លាំង ដ្បិតទើបតែ ២៨ ប្រកួត ក៏អាចរកបានដល់ ៣១ គ្រាប់និង Assit ៣ លើកឯណោះ នេះកំពុងឆ្ពោះទៅការឈ្នះពានស្បែកជើងមាសតំបន់អឺរ៉ុបនៅបញ្ចប់រដូវកាលទៀតផង៕
ប្រភព៖ បរទេស