ខ្សែប្រយុទ្ធ Neymar ត្រូវអ្នកជិតខាងរករឿងដល់ប៉ូលិសក្នុងតំបន់ផង ក្រោយពីផ្ទះរបស់គេតែងតែមានកម្មវិធីជប់លៀង និងមានសំឡេងរំខានច្រើនពេក។
ប្រភពនៅបារាំងបានអះអាងថា Neymar មិនមានប្រជាប្រិយភាពជាមួយអ្នកជិតខាងរបស់ខ្លួននោះទេ។ តាំងពីផ្ទេរទៅលេងនៅ PSG មក កីឡាករបារាំងរូបនេះបានទិញផ្ទះវីឡាកម្រិតផ្កាយ៥មួយក្នុងតំបន់ Yvelynes ចម្ងាយ១៥គីឡូម៉ែត្រពីកណ្ដាលក្រុងបារីស។ យ៉ាងណាមិញ ការទៅរស់នៅកន្លែងនោះដែរ កីឡាករប្រេស៊ីលហាក់មិនត្រូវជាមួយអ្នកជិតខាងប៉ុន្មាននោះទេ ដោយសារតែគេតែងតែបង្កជាសំឡេងរំខានច្រើន។ រហូតដល់មានអ្នកជិតខាងបានរាយការណ៍ទៅប៉ូលិសថែមទៀត។
ជាក់ស្ដែងកាលពីសប្ដាហ៍មុននេះ គេបានធ្វើពិធីជប់លៀងខួបកំណើតមួយនិងបានចាក់ភ្លេងឮខ្លាំងៗមែនទែន រហូតដល់មានអ្នកជិតខាងទូរសព្ទហៅប៉ូលិសមកសម្រួលថែមទៀត។ នៅពេលប៉ូលិសមកដល់ គេបានបន្ថយសំឡេងវិញ ប៉ុន្តែក្រោយពីប៉ូលិសទៅបាត់ ការជប់លៀងនោះបានតំឡើងសំឡេងឡើងវិញដដែល។ មានកម្មវិធីម្ដងៗ រហូតដល់ម៉ោង១២យប់ឯណោះ ដូច្នេះហើយទើបគេមិនចូលចិត្តនោះទេ៕