ខ្សែការពារ Thiago Silva ទទួលបានកុងត្រាថ្មីចំនួន១ឆ្នាំទៀតជាមួយក្រុមតោខៀវ Chelsea ក្រោយពីរួបគេនៅតែបង្ហាញទម្រង់លេងល្អប្រសើរដដែលនារដូវកាលនេះ។
Silva ត្រូវផុតកុងត្រានាចប់រដូវកាលនេះហើយ ប៉ុន្តែដោយសារតែរូបគេនៅលេងបានល្អ ហើយក៏ចង់បន្ដនៅក្លឹប Chelsea ទៀត ទើបការចរចាកុងត្រាថ្មី១ឆ្នាំទៀតអាចដំណើរការទៅបាន។ កីឡាករប្រេស៊ីលរូបនេះនឹងលេងនៅ Premier League បានដល់ឆ្នាំ២០២៤ខាងមុខ។ ខណៈដែលវ័យបច្ចុប្បន្នដល់៣៨ឆ្នាំទៅហើយ គេក៏អាចនឹងពិចារណាផងដែរក្នុងការចូលនិវត្តន៍នៅពេលអស់កុងត្រាជាមួយក្រុម Chelsea នេះ។
ក្លឹបតោខៀវ Chelsea បានចេញលិខិតបែបនេះថា៖ “គាត់ជាកីឡាករមានទេពកោសល្យ គាត់បានបង្ហាញវាជាច្រើនឆ្នាំមកហើយទាំងនៅក្លឹបនិងនៅជម្រើសជាតិ។ បទពិសោធ គុណភាពនិងភាពជាអ្នកដឹកនាំរបស់គាត់ គឺជាអ្វីដែលក្រុមរបស់យើងចង់បាននៅពេលខាងមុខ”៕