ខ្សែបម្រើ Martin Odegaard បានអះអាងថាក្រុមកាំភ្លើងធំ Arsenal នៅមិនទាន់គិតរឿងឈ្នះពានអ្វីនោះទេ បើទោះជាពួកគេជាក្រុមឈរនៅកំពូលតារាងជាយូរមកហើយក្ដី។
បច្ចុប្បន្ននេះ Arsenal កំពុងឈរលេខ១ក្នុងតារាង Premier League លើសក្រុមលេខ២ Manchester City ចំនួន៥ពិន្ទុ។ ទោះជាយ៉ាងនេះក្ដី ប្រធានក្រុម Odegaard បានអះអាងថាវាមិនទាន់បញ្ជាក់ពីការជោគជ័យអ្វីនោះទេ ពោលគឺត្រូវរង់ចាំរហូតដល់ចប់រដូវកាលសិន។ ក្រុម Arsenal កំពុងប្រឹងប្រែងបន្ថែមទៀត ដើម្បីបំពេញចន្លោះខ្វះខាតក្នុងក្រុម ហើយក៏មិនទាន់គិតច្រើនចំពោះការឈ្នះពានរង្វាន់ផងដែរ។
អតីតកីឡាករ Real Madrid ខាងលើបាននិយាយថា៖ “យើងកំពុងស្ថិតក្នុងការប្រជែងគ្នា។ ប៉ុន្តែដំណើរនៅវែងឆ្ងាយទៀត សូមជឿលើខ្ញុំ គ្មាននរណាម្នាក់ក្នុងក្រុមរបស់យើងគិតពីរឿងឈ្នះពាននៅឡើយទេ។ វាជារឿងសំខាន់ ប៉ុន្តែយើងកំពុងប្រឹងប្រែងពីមួយប្រកួតទៅមួយប្រកួត យើងប្រឹងហាត់ពីមួយថ្ងៃទៅមួយថ្ងៃ។ យើងនៅមានចំណុចជាច្រើនទៀតដើម្បីពង្រឹងសមត្ថភាព ហើយខ្ញុំជឿជាក់ថាយើងនឹងអាចសម្រេចបានរឿងជាច្រើន”៕