ប្រទេស៤នៅទ្វីបអាមេរិកខាងត្បូង បានសម្រេចចិត្តដេញថ្លៃធ្វើជាម្ចាស់ផ្ទះព្រឹត្តិការណ៍ World Cup 2030 ក្រោយពីមានការដាក់ដេញថ្លៃជាច្រើនពីតាមបណ្ដាប្រទេសនានា។
FIFA នៅមិនទាន់សម្រេចបាននៅឡើយទេ ថាប្រទេសណានឹងត្រូវជាម្ចាស់ផ្ទះសម្រាប់ការប្រកួត World Cup នៅឆ្នាំ២០៣០ខាងមុខ។ ខណៈដែលនៅឆ្នាំ២០២៦ មានប្រទេស៣នឹងធ្វើជាម្ចាស់សហម្ចាស់ផ្ទះគឺអាមេរិក កាដាណា និងមិចសិកូ។ ដោយសារតែចំនួនក្រុមកើនដល់៤៨ ដូច្នេះហើយទើបការធ្វើជាសហម្ចាស់ផ្ទះគឺជារឿងល្អបំផុតហើយ ព្រោះការប្រកួតក៏មានច្រើនដូចគ្នា។ ប្រទេសនៅទ្វីបអាមេរិកខាងត្បូងដែលចង់ដេញថ្លៃធ្វើម្ចាស់ផ្ទះ World Cup 2030 នោះរួមមាន អាហ្សង់ទីន ឈីលី ប៉ារ៉ាហ្គាយ និងអ៊ុយរុយហ្គាយ។ ការដេញថ្លៃ នឹងត្រូវធ្វើឡើងនៅខែមិថុនាឆ្នាំ២០២៣ខាងមុខនេះហើយ។
ដោយការដេញថ្លៃនេះដែរ ក៏ក្នុងគោលបំណងនៃការប្រារព្ធពិធីខួប១០០ឆ្នាំនេះព្រឹត្តិការណ៍ World Cup ផងដែរ។ ពោលគឺនៅឆ្នាំ១៩៣០ ការប្រកួតបាល់ទាត់ពាន World Cup ចាប់កំណើតឡើង ដោយប្រទេសអ៊ុយរុយហ្គាយកាលនោះធ្វើជាម្ចាស់ផ្ទះ៕