លោក Erik ten Hag អ្នកចាត់ការក្រុមបិសាចក្រហម Manchester United បានបង្ហាញពីការពេញចិត្តជាខ្លាំង ចំពោះការត្រលប់មកវិញរបស់ខ្សែប្រយុទ្ធ Jadon Sancho ។
នៅយប់មិញនេះ ក្រុម Man Utd លេងស្មើជាមួយក្រុម Leeds United ក្នុងលទ្ធផល ២-២ ដោយការវាយបកតាមស្មើបានវិញនោះក៏មាន១គ្រាប់ចេញពី Sancho ផងដែរ។ ការបង្ហាញទម្រង់លេងល្អឡើងវិញក្រោយពីទៅហ្វឹកហាត់ជាច្រើនសប្ដាហ៍នេះ បានធ្វើឱ្យ Ten Hag សប្បាយចិត្ត និងមានមោទកភាពចំពោះការធ្វើបានរបស់ Sancho មែនទែន។
អ្នកចាត់ការខាងលើបាននិយាយថា៖ “គាត់បានបង្ហាញពីទម្រង់លេងល្អមកវិញ។ ខ្ញុំមានមោទកភាពចំពោះអ្វីដែលគាត់បានធ្វើ។ ខ្ញុំគាំទ្រគាត់ និងគ្រូបង្វឹករបស់យើងសុទ្ធតែគាំទ្រគាត់។ គាត់បានកែប្រែខ្លួនឯង ហើយនេះជាអ្វីដែលគាត់បានធ្វើនិងតាំងចិត្ត។ ខ្ញុំពិតជាសប្បាយចិត្តនៅពេលឃើញគាត់អាចលេងបានល្អឡើងវិញ និងមានភាពជឿជាក់លើខ្លួនឯង”៕