មិនចម្លែកខុសពីអ្នកដទៃ ក៏មិនមែនជា Jose Mourinho ទាំងរបៀបនៃការនិយាយស្តី កាយវិការលើទីលាន តែងបង្ហាញមកខុសប្លែកពីគេ ដល់ថ្នាក់អ្នកគាំទ្រដាក់រហស្សនាមជា “Special One” លាន់ជាប់ច្រើនឆ្នាំមកទល់សព្វថ្ងៃ។
ប្រិយមិត្តប្រហែលជាធ្លាប់បានដឹងអំពីសមិទ្ធផលនានា ដែលបុរសវ័យ ៦០ ឆ្នាំធ្លាប់បានសម្រេច តែបង្វែរមកជ្រុងគួរឲ្យចាប់អារម្មណ៍មួយផ្សេងទៀត គឺពាក់ព័ន្ធនឹងការទស្សន៍ទាយ ប្រមើលមើលទុកជាមុន ក៏គ្រូបង្វឹកសញ្ជាតិព័រទុយហ្គាល់ ពូកែគន់គូរ ហើយអ្វីដែលធ្លាប់លោកនិយាយ ក៏រមែងតែងកើតជាការពិតនៅពេលបន្ទាប់។
៣) ជាអ្នករកឃើញចន្លោះប្រហោងរបស់ Man Utd
ចាយពេលដឹកនាំចន្លោះឆ្នាំ ២០១៦ ដល់ ២០១៨ មុនការចាកចេញរយៈពេលប៉ុន្មានខែ Mourinho បានលើកឡើងថា អ្វីដែល United ត្រូវធ្វើ គឺនាំចូលខ្សែការពារលំដាប់ World class តែវាបែរជាអ្វីដែលថ្នាក់លើក្លឹបបានបិទផ្លូវ មិនអនុញ្ញាតឡើយ។
ដល់តែពេលក្រោយៗមកដូចបានឃើញ ទោះមានខ្សែបម្រើ ខ្សែប្រយុទ្ធល្អ ដែលក្លឹបបានចាយលុយហូរហែនាំចូលជាបន្តបន្ទាប់ ក៏បិសាចក្រហមមិនទទួលបានជោគជ័យ មិនវិលមកភាពល្អប្រសើរនោះដែរ ទើបតែនៅពេលដែល United យកបាន Raphael Varane និង Lisandro Martinez ទើបកើតផ្លែផ្កា ត្រលប់ឲ្យ United ក្លាយជាក្លឹបដែលគេខ្លាចរអាជាថ្មីនៅ Premier League។
២) មើលឃើញអនាគតរបស់ Dele Alli
កំឡុងពេលនៅដឹកនាំ Spurs កាលឆ្នាំ ២០២០ លោក Mourinho និយាយឥតលាក់បាំងទៅកាន់ខ្សែបម្រើសញ្ជាតិអង់គ្លេស ថាគេជាកីឡាករល្អ មានឥទ្ធិពលតាំងពីថ្ងៃដែលលោកបានឃើញ តែលោកនៅតែមានអារម្មណ៍មួយថា Alli នឹងធ្វើឲ្យខ្លួនឯងធ្លាក់ចុះ ព្រោះពេលដែលកំពុងមានអាជីពដ៏អស្ចារ្យ បែរទៅវក់វីនឹងការដើរលេង ឈ្លក់ភ្លើងពណ៌ពេលរាត្រីទៅវិញ។
ឥតខុសការលើកឡើង ក្រោយចាកចេញពី Spurs កីឡាករវ័យ ២៦ ឆ្នាំ សឹងតែបាត់ឈ្មោះពីពិភពបាល់ទាត់ ក្រោយ Everton ព្រលែងឲ្យក្លឹបទួរគី Besiktas ខ្ចីជើង។ ជាងនេះ តែងកើតមានឈ្មោះមិនល្អលើក្របមុខសារព័ត៌មាន ដូចការញៀនហ្គេម Fortnite ដល់បែកបាក់ស្នេហាជាដើម។
១) ដឹងមុនអំពីការបញ្ជូនបាល់របស់ Paul Pogba
បើទោះបីធ្លាប់ជាគ្រូ តែក៏មិនជឿថាអាចដឹងច្បាស់ ១០០ ភាគរយអំពីកីឡាកររូបនោះដែរ តែនេះអ្នកចាត់ការសញ្ជាតិព័រទុយហ្គាល់ ដល់ថ្នាក់អាចដឹងមុនអំពីរបៀបបញ្ជូនបាល់របស់ខ្សែបម្រើឆ្នើមបារាំងទៀតផង។
មុនដល់ការប្រកួតទល់ United លោក Mourinho បានប្រាប់កីឡាករក្លឹប Spurs បែបនេះថា៖ “គ្រប់ពេលដែល Pogba មានបាល់នៅនឹងជើង គេតែងអាចសម្លឹងឃើញឆ្ងាយ គេមានគុណភាពនៃការបញ្ជូន យើងអាចស្រមៃត្រង់កន្លែងនេះ ពេល Pogba នៅតំណែងបម្រើខាងក្រោមស្លាបស្តាំ គេអាចបញ្ជូនបាល់ឆ្លងកាត់យ៉ាងស្អាត ទៅកាន់ Marcus Rashford នៅត្រង់នេះ”។
ឥតខុសពីការនិយាយ ដល់តែក្នុងការប្រកួត ក៏មានសាច់បាល់មួយ ដែល Pogba បញ្ជូនចេញពីតំបន់បម្រើស្លាបស្តាំ នៅខាងក្រោម មកឆ្លងផុតដាច់មាត់ដល់ Rashford នៅខាងលើ តែដោយសារសម្តីគ្រូហាក់បានរង្គើដាស់ស្មារតីកីឡាករ Spurs ជាមុន ពេលនោះក៏ឃើញ Davinson Sanchez រត់មករារាំង ផ្តាច់យកបាល់បានសម្រេចពី Rashford មិនគួរឲ្យជឿ៕
ប្រភព៖ បរទេស