លោក Eirk ten Hag អ្នកចាត់ការក្រុម Manchester United បានចេញច្បាប់៣យ៉ាងឱ្យកីឡាករទាំងអស់គោរពតាម ដើម្បីរក្សាទម្លាប់ល្អ និងសហការគ្នាជាក្រុម។
ក្រោមការដឹកនាំរបស់អ្នកចាត់ការហុល្លង់រូបនេះ ឃើញថាក្រុម Man Utd ចាប់ផ្ដើមល្អប្រសើរឡើងវិញជាបណ្ដើរៗហើយ។ ជាក់ស្ដែងបច្ចុប្បន្ននេះ ពួកគេលេងបានយ៉ាងល្អ ហើយកីឡាករក៏សហការគ្នា មិនគិតតែប្រយោជន៍ផ្ទាល់ខ្លួនផងដែរ។ ចំពោះរឿងអភិវឌ្ឍក្រុមឡើងវិញនេះដែរ ខ្សែបម្រើ Fred បាននិយាយថាលោក Ten Hag បានដាក់ចេញច្បាប់ដល់ទៅ៣ឯណោះដើម្បីឱ្យកីឡាករទាំងអស់គោរពតាម។
Fred បានរៀបរាប់ច្បាប់ទាំងអស់នោះថា៖ “គាត់បានដាក់ចេញជាច្បាប់៣ឱ្យយើងធ្វើតាមគឺ ហាមមកយឺត មិនត្រូវធ្វើរឿងមិនត្រឹមត្រូវ ហើយអ្នកត្រូវតែធ្វើរឿងដែលមានប្រយោជន៍ដល់សមាជិកក្រុមប៉ុណ្ណោះ។ នោះគឺជារឿងសំខាន់”។ ខណៈដែលច្បាប់ទាំងនេះហើយ ទើបធ្វើឱ្យ Man Utd ហាក់ប្រសើរឡើងវិញនាពេលបច្ចុប្បន្ននេះ៕