ខ្សែប្រយុទ្ធ Kazuyoshi Miura វ័យ៥៥ឆ្នាំរបស់ជប៉ុន បានចុះកុងត្រាខ្ចីជើងលេងនៅលីគលំដាប់ទី២របស់ព័រទុយហ្គាល់ហើយ ក្រោយពីបានធ្វើតេស្ដសមត្ថភាពយ៉ាងជោគជ័យ។
Miura លេងនៅជប៉ុនជាច្រើនឆ្នាំមកហើយ ខណៈដែលក្លឹបនៅលីគទី២ព័រទុយហ្គាល់ចាប់អារម្មណ៍ លោកក៏សម្រេចចិត្តចូលរួមតែម្ដង។ ក្លឹបនៅលីគទី២នោះគឺ Oliveirense ដែលបានសម្រេចចុះកុងត្រាយកខ្សែប្រយុទ្ធវ័យ៥៥ឆ្នាំនេះរហូតដល់ចប់រដូវកាល។ លោក Miura ក៏មានបំណងបញ្ចប់អាជីពបាល់ទាត់របស់ខ្លួនផងដែរ តែនៅអាយុ៦០ឆ្នាំឯណោះ។ ដូច្នេះ លោកនៅសល់ពេល៥ឆ្នាំទៀតដើម្បីបន្ដអាជីពបាល់ទាត់នេះ ក្នុងការសម្រេចក្ដីស្រមៃខ្លួន។
បុរសដែលមានរហស្សនាម King Kazu ខាងលើនេះ ក៏ធ្លាប់ជាកីឡាករជម្រើសជាតិជប៉ុនផងដែរពីឆ្នាំ ១៩៩០ ដល់២០០០។ នៅក្លឹបបាល់ទាត់អាជីពវិញ លោកចាប់ផ្ដើមអាជីពតាំងពីឆ្នាំ១៩៨៦មក ជាមួយក្លឹប Santos ហើយធ្លាប់លេងឱ្យក្លឹបជាង១០ក្លឹបមកហើយ។ ក្លឹបចុងក្រោយដែលលោកលេងច្រើនឆ្នាំបំផុតនោះគឺ Yokohama FC ពីឆ្នាំ២០០៥មក។ បច្ចុប្បន្នលោកក៏ជាកីឡាករក្លឹប Yokohama FC ដែរ ដោយលេងឱ្យក្លឹប Oliveirense គឺក្រោមលក្ខខណ្ឌខ្ចីជើងប៉ុណ្ណោះ៕