ខ្សែប្រយុទ្ធវ័យ ២៣ឆ្នាំ Cody Gakpo បានបង្ហាញខ្លួនចំនួន ៥ដងសម្រាប់ក្រុមរបស់លោក Jurgen Klopp ចាប់តាំងពីការផ្ទេរពីក្លឹប PSV ខែមករា ដោយមិនបានស៊ុតបញ្ចូលទី ឬការបញ្ជូនបាល់នៅឡើយ ខណៈដែលក្រុមហង្សក្រហមបានធ្លាក់ក្នុងលីគជាខ្លាំង ហើយត្រូវបានធ្លាក់ចេញពី FA Cup។
Gakpo បានកត់ត្រាគ្រាប់បាល់ចំនួន ៩គ្រាប់ និងបញ្ជូនបាល់ ១២ដងក្នុង ១៤ប្រកួត Eredivisie នៅរដូវកាលនេះ មុនពេលផ្លាស់ទៅ Anfield ប៉ុន្តែរហូតមកដល់ពេលនេះមិនអាចចម្លងទម្រង់បែបបទនោះនៅក្នុងប្រទេសអង់គ្លេសបាននោះទេ។
ថ្លែងទៅកាន់ Stats Perform អតីតកីឡាករជម្រើសជាតិហូឡង់ Sneijder បានបង្ហាញពីជំនឿរបស់គាត់ថា Gakpo គឺជា “កីឡាករដ៏អស្ចារ្យ” ដែលអាចជួយក្រុមថ្មីរបស់គាត់ឱ្យងើបឡើងវិញនូវរដូវកាលនេះ។ គាត់បាននិយាយថា៖
“ពិតណាស់ ខ្ញុំមានទំនុកចិត្ត គាត់អាចធ្វើឱ្យប្រសើរឡើងនៅ Liverpool។ វាតែងតែពិបាកក្នុងការផ្លាស់ប្តូរក្លឹបក្នុងពាក់កណ្តាលរដូវកាល។ អ្នកមិនមានពេលវេលាដើម្បីសម្របខ្លួនទេ។
ជាធម្មតា នៅពេលអ្នកចាប់ផ្តើមជាមួយក្លឹបថ្មីនៅមុនបើករដូវកាល អ្នកមានពេលយូរជាងក្នុងការសម្របខ្លួនទៅនឹងប្រព័ន្ធលេង សម្របខ្លួនទៅនឹងប្រទេស សម្របខ្លួនទៅនឹងអ្វីៗគ្រប់យ៉ាង និងបាល់ទាត់អង់គ្លេសផងដែរ។
ឥឡូវនេះគាត់បានមកដល់ហើយ គាត់ត្រូវតែលេងដោយផ្ទាល់ ដូច្នេះវាពិតជាលំបាក ហើយយើងគួរតែផ្តល់ពេលឱ្យគាត់បន្ថែមទៀត ពីព្រោះគាត់ជាកីឡាករដ៏អស្ចារ្យដែលមានការរីកចំរើនច្រើន”៕