នៅទីបំផុតក្លឹបតោខៀវ Chelsea ទិញបានខ្សែបម្រើ Enzo មករួមក្រុមហើយ ជាមួយតម្លៃផ្ដាច់កុងត្រារបស់គេដល់ទៅ១០៧លានផោនឯណោះពីក្រុម Benfica ។
ក្រុម Chelsea បានដាក់គោលដៅយកកីឡាករ Enzo Fernandez ជាគោលដៅសំខាន់ទី១តែម្ដងនៅខែមករានេះ។ តែយ៉ាងណា ពួកគេត្រូវរង់ចាំដល់នាទីចុងក្រោយនៃទីផ្សារដោះដូរកីឡាករឯណោះ ទើបអាចសម្រេចការផ្ទេរបាន ជាមួយតម្លៃបំបែកកំណត់ត្រានៅអង់គ្លេសតែម្ដង ១០៧លានផោន។ តម្លៃខ្លួនដ៏ខ្ពស់នេះកើតមានបាន ក៏ព្រោះតែក្លឹប Benfica មិនព្រមលក់នោះទេ តែដោយសារចិត្តចង់បានខ្លាំង ទើប Chelsea ហ៊ានឱ្យគ្រប់យ៉ាង ឱ្យតែក្រុម Benfica ព្រមលក់។
ខ្សែបម្រើវ័យ២២ឆ្នាំនេះ ក៏មានកុងត្រាវែងខ្លាំងដែរនៅ Stamford Bridge ពោលគឺគេនឹងចុះកុងត្រាដល់ទៅ៨ឆ្នាំកន្លះឯណោះ រហូតដល់ឆ្នាំ២០៣១ឯណោះ ទើបផុតកុងត្រា។ ជាមួយការចំណាយយ៉ាងច្រើនលើសលុបនេះដែរ នាខែមករាឆ្នាំ២០២៣នេះ ក្រុម Chelsea គឺជាក្រុមចំណាយលើការទិញដូរកីឡាករច្រើនជាងគេហើយ៕