ខ្សែប្រយុទ្ធ Nick Taylor បច្ចុប្បន្នកំពុងស្ថិតនៅប្រទេសកម្ពុជា និងទទួលបានការចាប់អារម្មណ៍ជាច្រើនពីសំណាក់ក្លឹបក្នុងលីគកំពូល ហើយក៏មានដំណឹងថារដូវកាលថ្មីគេនឹងលេងនៅទីនេះផងដែរ។
ទន្ទឹមគ្នានឹងដំណឹងដ៏ល្អនេះ ក៏ស្រាប់តែមានដំណឹងមួយថា កីឡាករកូនកាត់ខ្មែរ អាមេរិក រូបនេះក៏មានបំណងចង់ចូលជួយជម្រើសជាតិនៅស៊ីហ្គេម២០២៣ខាងមុខនេះផងដែរ។ Nick បាននិយាយបែបនេះថា៖ “ខ្ញុំពិតជាពេញចិត្ត ប្រសិនបើត្រូវបានកោះហៅចូលក្រុមជម្រើសជាតិអាយុក្រោម 22ឆ្នាំ ដើម្បីតំណាងឱ្យកម្ពុជា នៅស៊ីហ្គេមឆ្នាំ២០២៣។ វាគឺជាឱកាសក្នុងការលេងតំណាងឱ្យប្រទេសដ៏អស្ចារ្យ ហើយដែលនឹងធ្វើឡើងនៅកម្ពុជាទៀត”។
រំលឹកដែរថា ស៊ីហ្គេម២០២៣នឹងឈានមកដល់នៅ៣ខែខាងមុខទៀតនេះហើយ។ ក្នុងការប្រកួតកីឡាបាល់ទាត់នៅស៊ីហ្គេមនេះគឺប្រើប្រាស់កីឡាករអាយុក្រោម ២២ឆ្នាំ ព្រមជាមួយការអនុញ្ញាតឱ្យប្រើប្រាស់កីឡាករលើសអាយុចំនួន ៣នាក់ផងដែរនៅក្នុងក្រុម។ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ធ្លាប់បានបញ្ជាក់ថា លោកគ្រោងនឹងធ្វើការកោះហៅកីឡាករលើសអាយុចំនួន ៣នាក់ ដើម្បីជួយក្រុមប្រកួតនាមជាម្ចាស់ផ្ទះលើកដំបូងក្នុងប្រវត្តិសាស្ត្រ។
Nick មានម្ដាយសញ្ជាតិខ្មែរ និងឪពុកសញ្ជាតិអាមេរិក ហាក់សម្ដែងការពេញចិត្តប្រសិនជាបានក្លាយជាផ្នែកមួយនៃក្រុមបាល់ទាត់ជម្រើសជាតិកម្ពុជា អាយុក្រោម ២២ឆ្នាំ ប្រកួតក្នុងព្រឹត្តិការណ៍ដ៏មានសក្ដានុពលប្រចាំតំបន់ បើទោះបីជាបច្ចុប្បន្នមានវ័យ ២៤ឆ្នាំក៏ដោយ៕